गिरिजानन्द साह/जनकपुरधाम/जेठ २८ गते। गृह, सञ्चार तथा कानुन मन्त्रालयको आयोजना र जिल्ला ट्राफिक प्रहरी कार्यालय धनुषाको सहकार्यमा सञ्चालित “ट्राफिक सप्ताह २०८२” बुधबार औपचारिक रुपमा सम्पन्न भएको छ।
मधेस प्रदेश प्रहरी कार्यालयका प्रमुख डिआईजी उमा प्रसाद चतुर्बेदीको अध्यक्षता तथा गृह, सञ्चार तथा कानुन मन्त्री राजकुमार लेखीको प्रमुख आतिथ्यमा जनकपुरधाममा आयोजित समापन समारोह भव्य रुपमा सम्पन्न भएको हो।
जेठ २२ गतेदेखि सुरु भएको यो सप्ताह “Safe Drive, Long Life” तथा “सडक अनुशासन तथा सवारी दुर्घटना न्यूनीकरण” भन्ने नाराका साथ सञ्चालन गरिएको थियो। ट्राफिक सप्ताहको उद्देश्य सडक अनुशासन, सवारी सुरक्षा र दुर्घटना न्यूनीकरणका लागि जनचेतना फैलाउने रहेको थियो।
सप्ताहभर विभिन्न सचेतनामूलक कार्यक्रमहरू सञ्चालन गरिएको थियो, जसअन्तर्गत प्रट्राफिक सप्ताह २०८२ अन्तर्गत ट्राफिक अनुशासन र सडक सुरक्षासम्बन्धी सन्देश बोकेर सहभागीद्वारा प्रभातफेरी,विद्यार्थीहरुलाई ट्राफिक सचेतना सम्बन्धि प्रशिक्षण,चालकहरुको स्वास्थ्य जाँच,चालक तथा यात्रु संग १ मिनेट कार्यक्रम,विभिन्न सचेतनामुलक ३२०० स्टिकर वितरण,खुल्ला रक्तदान कार्यक्रम र सार्वजनिक सवारी साधनहरूको मेकानिकल जाँच जस्ता गतिविधिहरू समावेश थिए।
समापन समारोहमा गृहमन्त्री राजकुमार लेखीले ट्राफिक सप्ताह सफलतापूर्वक सम्पन्न भएकोमा खुशी व्यक्त गर्दै यस्ता कार्यक्रमले जनचेतना अभिवृद्धिमा ठूलो भूमिका खेल्ने विश्वास व्यक्त गरे।
कार्यक्रमको सञ्चालन धनुषाका ट्राफिक प्रमुख इन्स्पेक्टर सुर्य बहादुर शाहीले गरेका थिए। जिल्ला ट्राफिक प्रहरी धनुषाले “ट्राफिक सप्ताह २०८२” को सफल समापनसँगै आगामी दिनहरूमा पनि यस्ता जनचेतनामूलक कार्यक्रमलाई निरन्तरता दिने बताएका छन्।
Discussion about this post