धनुषामा विद्यालय भवन निर्माणको विषयमा झडप हुँदा दुई जना गम्भीर घाइते, तीन राउण्ड हवाई फायर

श्रावण २२ गते। धनुषाको मुखियापट्टी मुसहरनिया गाउँपालिकाको एक विद्यालय भवन निर्माणको विषयमा झडप हुँदा झडपमा परी दुई जना गम्भीर घाइते भएका छन् । 

मुखियापट्टी मुसहरनिया गाउँपालिका ४ कोल्हुवा स्थित वैद्यनाथ देवनारायण जनता नमूना माध्यमिक विद्यालयको भवन निर्माण गुणस्तरहीन भइरहेको र खर्च पारदर्शी नभएको भन्दै आइतवार भएको दुई पक्षीय झडपमा स्थानीय ज्ञानेन्द्र यादव र शंकर यादव गम्भीर घाइते भएका छन् ।

धनुषा प्रहरीका अनुसार घाइते मध्ये ज्ञानेन्द्रलाई थप उपचारका लागि काठमाडौ रेफर गरिएको छ । शंकरको उपचार जनकपुरको रामजानकी हस्पीटलमा भइरहेको छ ।

विवाद बढ्दै झडपकाे रूप लिएपछि व्यापक सुरक्षाकर्मी परिचालन गरिएको थियो । अवस्था तनावग्रस्त बन्दै गएपछि प्रहरीले तीन राउण्ड हवाई फायर गरेको जिप्रका धनुषाले जनाएको छ । प्रहरीले दिएको जानकारी अनुसार घटनामा संलग्नहरू अहिले फरार रहेका छन् । उनीहरूको पहिचान भइसकेकाले खोजी कार्य जारी रहेको छ ।

संघीय सरकारको नमूना विद्यालय कार्यक्रम अन्तर्गत निर्माण भइरहेको विद्यालय भवनको तेश्रो तल्लाको छत ढलानकाे काम स्थानीय युवाहरूले गुणस्तरहीन र कमसल भइरहेको भन्दै शनिबार नै विवाद गर्दै काम रोकाएका थिए । उनीहरूले इस्टिमेटमा १० एमएमको छड उल्लेख रहेकोमा ७/८ एमएमको छड प्रयोग भइरहेको र पर्खाल ५ इन्चको खडा गरिएको भन्ने आरोप लगाउँदै खर्चकाे हिसाब माग गरेका थिए ।

संघीय सरकारको नमूना विद्यालय व्यवस्थापन एवं सुदृढीकरण कार्यक्रम अन्तर्गत डेढ करोडको बजेटमा विद्यालयको तीन तल्ले भवन निर्माण भइरहेको छ । ती मध्ये पहिलो भूईतल्ला निर्माण भइसकेको छ भने दोश्रो र तेश्रो तल्लाको काम भइरहेको छ । ती मध्ये तेश्रो तल्लाको छत ढलाई क्रममा विवाद भएको हो ।

विद्यालयका अनुसार डेढ करोड बजेट मध्ये ५० लाख रुपैयाँ शैक्षिक व्यवस्थापन र एक करोड रुपैयाँ भवन निर्माणका लागि रहेको छ । विद्यालय व्यवस्थापन समिति नहुँदा वडा समितिद्वारा निर्माण समिति गठन गरी कोटेशन मार्फत तीन वर्षदेखि निर्माण कार्य भइरहेको छ ।