निहारिका राजपूत डेरामै अचेत अवस्थामा फेला, विष सेवनको नाटक !

जनकपुरधाम/बैशाख ७ गते । जनकपुरधाम उपमहानगरपालिका ४ विषहरा मिट क्याम्पसको छेउमै रहेको डेरामा निहारिका राजपुत अचेत अवस्थामा फेला परेकी छिन् । कुमारी आमाका रूपमा चिनिने उनी बिहीबार अचेत अवस्थामा फेला परेपछि प्रहरीले उपचारका लागि प्रादेशिक अस्पताल लगेको छ ।

स्थानीयले निहारिका डेरामै छटपटाइरहेको भनेर प्रहरीलाई खबर गरेका थिए । डेरामा बस्ने छिमेकीलाई निहारिकाले ‘मलाई विष खुवायो’ भनेर अन्तिम शब्द बोल्दै ढलेको नाटक गरेकी थिइन् । तर जिल्ला प्रहरी कार्यालयका डीएसपी वेदप्रसाद गौतमले उनले विष नखाएको बताए ।

‘विष सेवन गरेको आशंका गरिएको थियो तर अस्पतालले त्यस्तो केही छैन, अवस्था सामान्य छ’,डीएसपी गौतमको भनाइ छ । निहारिकाले करिब तीन महिनाअघि शिवराजसँग विवाह गरेकी थिइन् । स्रोतकाअनुसार निहारिका र शिवराजको सम्बन्ध बिग्रिन थालेपछि उनले यस्तो नाटक गरेकी हुनसक्छिन् । 

स्रोतका अनुसार निहारिका र उनका श्रीमान शिवराज श्रेष्ठबीच केहि दिनदेखि सम्बन्ध विग्रेको छ । त्यसैले उनी डेरा लिएर केहि दिनदेखि छोरासंग जनकपुरधाममा बस्दै आएकी थिए ।

शिवराजसंग प्रेम गरेकै बेला निहारिका गर्भवती भएकी थिइन् । शिवराज गर्भ फाल्न दबाब दिए । तर उनी नमानेपछि शिवराज सम्बन्ध तोडेका थिए। त्यसपछि उनी बच्चा (छोरा) जन्माइन् र शिवराजविरुद्ध बलात्कार मुद्दा दर्ता गराईन् ।

तीन वर्षसम्म मुद्दा लडेपछि अदालतले शिवराजलाई निर्दोष रहेको फैसला गरेपछि उनी लामो समयसम्म आन्दोलन गरिन् । त्यसपछि छोरा र शिवराजको डिएनए परीक्षणको आदेश भयो । र, परीक्षण गर्दा शिवराज र उनका छोराको डिएनए मिल्यो ।

त्यसपछि ०७९ माघ १७ मा शिवराज र निहारिकाले श्रीमान- श्रीमतीको रुपमा बस्ने भन्दै अदालतमै मिलापत्र गरेका थिए । लगत्तै उनी दुबैजना जानकी मन्दिरमा विवाह गरिन् । र, अहिले उनीहरुबीच फेरी सम्बन्ध चिसिएको छ ।