जनकपुरधाम/बैशाख ६ गते। नेपाल रेल्वे कम्पनी लिमिटेडले विज्ञापन रद्द भएको झण्डै अढाइ वर्षपछि दस्तुर फिर्ता गर्ने भएको छ।
नेपाल रेल्वे कम्पनीले २०७७ साल भदौ २९ गते विभिन्न पदका लागि करारमा कर्मचारी भर्ना गर्न विज्ञापन आह्वान गरेको थियो। पछि विज्ञापन रद्द भए पनि दर्खास्त भर्नेले सो वापतको दस्तुर फिर्ता पाएका थिएनन्।
सोमबार नेपाल रेल्वे कम्पनीले सूचना प्रकाशित गर्दै ३५ दिनभित्र कार्यालय समयमा निवेदनका साथमा सक्कल बैंक भौचर र नागरिकता प्रमाणपत्रको प्रतिलिपिसहित केन्द्रीय कार्यालय, जनकपुरधाममा सम्पर्क राख्न भनेको छ।
रेल्वे कम्पनीले करारमा विभिन्न २९ पदको लागि १२९ जना कर्मचारी माग्दा ३२ हजार ६८६ जनाले दरखास्त भरेका थिए।
रेल्वे कम्पनीले अधिकृत स्तरको प्रत्येक विज्ञापनको लागि १०००, सहायक स्तरको लागि ४०० र श्रेणीविहीन स्तरको विज्ञापनको लागि ३०० रुपैयाँ दस्तुर तय गरेको थियो।
रेल्वे कम्पनीले आह्वान गरेको विज्ञापनमा अधिकृत स्तरको पदका लागि १ हजार २२४ जना, सहायक पदको लागि २९ हजार ५५४ जना र श्रेणीविहीन पदका लागि १ हजार ८६८ जनाले दरखास्त दिएका थिए।
अधिकृत स्तरको विज्ञापनबाट १२ लाख २४ हजार, सहायक स्तरको विज्ञापनबाट १ करोड १८ लाख २१ हजार ६०० र श्रेणीविहीन स्तरको विज्ञापनबाट ५ लाख ६० हजार ४०० गरी कुल १ करोड ३६ लाख ६००० रुपैयाँ राजश्व संकलन गरिएको थियो।
अधिकृत स्तरतर्फ स्टेसन मास्टरका लागि ९०८ जना, शाखा अधिकृतका २५४ जना र कानुन अधिकृतका लागि ६२ जना दरखास्त दिएका थिए।
Discussion about this post