सिरहाको लाहन घर भएकी ६५ वर्षीया कोरोना संक्रमित महिलाको विराटनगरमा मृत्यु

सिरहा ।सिरहाको लहान नगरपालिका-९ खुट्टीपारी घर भएकी ६५ वर्षीया वृद्धा महिलाको कोरोना संक्रमण बाट विराटनगरस्थित कोशी अस्पताल कोभिड १९ उपचार केन्द्रमा उपचारको क्रममा मृत्यु भएको छ।

बिहीबार कोरोना पोजेटिभ देखिएपछि राति १० बजे ती महिलालाई अस्पतालमा भर्ना गरिएको थियो।शुक्रबार बिहान एक्कसी स्वासप्रस्वासमा समस्या बढेपछि ७ बजेबाट बिरामीलाई भेन्टिलेटरमा राखेर उपचार भइरहदा शुक्रबार बिहान पौने ११ बजे अस्पतालमा मृत्यु भएको कोभिड १९ उपचार केन्द्रका प्रमुख डा. दीपक सिग्देलले जानकारी दिएका छन ।मृतक महिला दीर्घरोगी भएको र श्वासप्रश्वासमा समस्या रहेको अस्पतालको भनाई छ ।

यस्तै सिरहाको सुखिपुर नगरपालिका ८ का ५५ वर्षीय पुरुषको बिहिबार साँझ उपचारको क्रममा मृत्यु भएको थियो । मृत्यु भएका पुरुषलाई अत्यधिक खोकी, श्वासप्रश्वासमा समस्या र ज्यरो आएपछि धरानको विपि कोइराला स्वास्थ्य विज्ञान प्रतिष्ठानमा उपचार गराउन लगिएको थियो ।मृतक पुरुष उच्च रक्तचाप दीर्घ रोगी रहेको र टिबी रोगको औषधी १८ महिना सेवन गरेका थिए ।

योसँगै सिरहामा कोरोना संक्रमणबाट मृत्यु हुनेको संख्या ६ पुगेको छ । यस अघि २२ साउनमा गोलबजार नगरपालिका १२ वेतौनाका २३ वर्षीय युवक, साउन २९ मा विष्णुपुर गाउँपालिका १ का ४० वर्षीय पुरुष, भदौ २ मा मिर्चैया नगरपालिका ४ का ६० वर्षीय पुरुष, भदौ ८ मा लहान नगरपालिका २४ गोविन्दपुर मलहनमाका २२ वर्षीय युवकको कोरोना संक्रमणका कारणले मृत्यु भएको जिल्ला स्वास्थ्य कार्यालय सिरहाका प्रमुख कृष्णदेव यादवले बताए ।

दुई जनाको विराटनगरको कोशी अस्पताल, तीन जनाको विपि कोइराला स्वास्थ्य विज्ञान प्रतिष्ठानमा उपचारको क्रममा र एक जनाको स्वाव दिएपछि घरमै मृत्यु भएको प्रमुख यादवले जानकारी दिए ।