विदेशबाट फर्किएका सप्तरीकमा एक व्यक्तिको काठमाडौंमा सुन र मोवाइल लुटेको आरोपमा दुईजना प क्राउ

काठमाडौ/कार्तिक १७ गते।विदेशबाट फर्किएका व्यक्तिहरुको सुन र मोवाइल लुटेको आरोपमा प्रहरीले दुईजनालाई पक्राउ गरेको छ ।

पक्राउ पर्नेमा गोरखा आरुघाट घर भएका  ३० वर्षीय मिलन काप्री र  दाङको घोराही उपमहानगरपालिका–११ घर भएका २५ वर्षीय युवराज कुँवर छन् । 

कात्तिक ११ मा सप्तरीको सुरुङ्गा नगरपालिका–७ बस्ने ३५ वर्षीय अजय कुमार चौधरीको सुन र मोवाइल लुटपाटमा संलग्न २ जनालाई पक्राउ गरिएको काठमाडौंका एसएसपी अशोक सिंहले बताए । 

कतारबाट फर्केका चौधरीलाई मध्यराति ४ जना अपरिचित व्यक्तिहरुले एयरपोर्टबाट तीनकुनेतर्फ जाँदै गर्दा लुटेका थिए । चौधरी चढेको बा.२ ज १०९५ नम्बरको ट्याक्सीलाई ‘हामी सिआईडी हौं’ भन्दै रोकेर आरोपीहरुले कतारबाट ल्याएको २५ ग्राम सुन, एउटा मोवाइल र  ६ सय कतारी रियाल समेत गरी २ लाख ४२ हजार रुपैयाँ बराबरको धनमाल लुटेका हुन् । 

लुटमा संलग्नहरूले बागमती प्रदेश–०२–०१५ प ७४६८ नम्बरको मोटरसाइकलको नम्बर प्लेटमा हिलो छ्यापेर लुटपाट गरेको प्रहरीको प्रारम्भिक अनुसन्धानबाट थाहा भएको छ । महानगरीय प्रहरी वृत गौशालाको टोलीले आरोपीहरुको साथबाट लुटमा प्रयोग भएको सो मोटरसाइकल बरामद गरेको छ ।

मोटरसाइकलमा आएका ४ जनाले विमानस्थलदेखि नै फलो गरेर उनलाई लुटेका प्रहरीको प्रारम्भिक अनुसन्धानबाट थाहा भएको छ । फरार अरु आरोपीहरुको खोजी भइरहेको महानगरीय प्रहरी वृत गौशालाका डिएसपी केशव भट्टराईले बताए ।