जनमत पार्टीको अध्यक्षमा पुनः सीके राउत, महासचिवमा सञ्जय यादव निर्वाचित

वीरगञ्ज/असोज १८ गते । जनमत पार्टीको दोस्रो महाधिवेशनबाट डा. चन्द्रकान्त (सीके) राउत पुनः अध्यक्षमा निर्वाचित भएका छन् । वीरगञ्जमा सम्पन्न महाधिवेशनअन्तर्गत भएको निर्वाचनमा राउतले ९५८ मत प्राप्त गर्दै अध्यक्ष पदमा निरन्तरता पाएका हुन् ।

अध्यक्ष पदमा राउतको मात्रै उम्मेदवारी परेको थियो । तर, पार्टीको विधानअनुसार उम्मेदवारले कुल सदर मतको कम्तीमा २० प्रतिशत मत प्राप्त गर्नुपर्ने व्यवस्था रहेकाले एकल उम्मेदवारी भए पनि अध्यक्ष पदमा मतदान भएको थियो । राउतले आवश्यक मतसीमा पार गर्दै अध्यक्षमा निर्वाचित भएका हुन् ।

महाधिवेशनमा २६ पदाधिकारीसहित ९९ पदका लागि निर्वाचन भएको थियो । अध्यक्षबाहेकका अधिकांश पदमा प्रतिस्पर्धात्मक निर्वाचन भएको थियो ।

महाधिवेशनबाट सात जना उपाध्यक्ष निर्वाचित भएका छन् । अनिताकुमारी मण्डल, अनितादेवी साह, नरेन्द्रप्रसाद चौधरी, बसन्तकुमार कुशवाहा, डा. जयकान्त राउत, राजयकुमार यादव र माधवप्रसाद सिंह उपाध्यक्षमा निर्वाचित भएका हुन् ।

उपाध्यक्षका लागि ११ जना उम्मेदवारबीच प्रतिस्पर्धा भएको थियो । परमेश्वर मुर्मु, हरपाल सिंह सोडी, मनोहरा देवी बैठा र रोशन खातुन भने निर्वाचित हुन सकेनन् ।

महासचिवमा सञ्जय यादव

जनमत पार्टीको महासचिवमा सिरहाका सञ्जयकुमार यादव निर्वाचित भएका छन् । उनले ६१८ मत प्राप्त गर्दै महासचिव पदमा विजयी भएका हुन् ।

महासचिव पदमा यादवसँगै ममता झा र निवर्तमान महासचिव चन्दनकुमार सिंह प्रतिस्पर्धामा थिए । झाले २२० तथा सिंहले १६५ मत प्राप्त गरेका छन् । दुवैले पार्टीले तोकेको २० प्रतिशतको मतसीमा पार गर्न नसकेको जनमत पार्टीले जनाएको छ ।

उपमहासचिवमा निर्मल मण्डल

उपमहासचिवमा सिरहाका निर्मलकुमार मण्डल निर्वाचित भएका छन् । मण्डलले ५०१ मत प्राप्त गर्दा उनका प्रतिस्पर्धी ललितचन्द्र मल्लिकले ४१४ मत पाएका छन् ।

त्यस्तै, सचिवमा सुरेन्द्र शर्मा, पारसप्रसाद साह, सन्तोष राज सहनी, अन्जनी देवी, राधाकुमारी यादव, हरेन्द्र चौधरी र बालगोविन्द चौधरी निर्वाचित भएका छन् । सचिव पदका लागि नौ जना उम्मेदवारबीच प्रतिस्पर्धा भएको थियो ।

वीरगञ्जमा सम्पन्न दोस्रो महाधिवेशनबाट जनमत पार्टीले अध्यक्षसहित नयाँ केन्द्रीय नेतृत्व चयन गरेको छ । अध्यक्षमा राउतले निरन्तरता पाउँदा महासचिवसहित अन्य पदमा नयाँ नेतृत्व निर्वाचित भएको छ ।