वडा कार्यालयमै फोहोर थुपारेर झिटकहियाका युवाको विरोध, सरसफाइमा ध्यान दिन माग

झिटकहिया युवा संगठनको अगुवाइमा युवाहरूले गाउँका विभिन्न स्थानमा लामो समयदेखि थुप्रिएको फोहोर ट्र्याक्टरमा संकलन गरी वडा नं. १ को कार्यालय परिसरमा लगेर थुपारेका हुन्।

युवाहरूका अनुसार गाउँमा फोहोर व्यवस्थापनको समस्या बढ्दै गएपछि यसबारे छलफल गर्न वडा अध्यक्षलाई सम्पर्क गर्ने प्रयास गरिएको थियो। तर वडा अध्यक्ष कार्यालयमा उपस्थित हुन नआएपछि संकलित फोहोर वडा कार्यालय परिसरमै थुपारेर विरोध जनाइएको हो।

स्थानीय युवाहरूले गाउँमा लामो समयदेखि फोहोर व्यवस्थापनको समस्या रहँदै आए पनि सम्बन्धित निकायले प्रभावकारी पहल नगरेको गुनासो गरेका छन्। गाउँका सडक, चोक तथा सार्वजनिक स्थानमा फोहोर थुप्रिँदा दुर्गन्ध फैलिनुका साथै सरसफाइ र जनस्वास्थ्यमा समेत असर पर्ने अवस्था सिर्जना भएको उनीहरूको भनाइ छ।

युवाहरूले गाउँमा नियमित फोहोर संकलन, उचित व्यवस्थापन तथा सरसफाइको प्रभावकारी व्यवस्था गर्न स्थानीय सरकारसँग माग गरेका छन्। फोहोर व्यवस्थापनजस्तो जनस्वास्थ्यसँग प्रत्यक्ष जोडिएको विषयमा स्थानीय तह गम्भीर भएर तत्काल समाधानको पहल गर्नुपर्ने उनीहरूको भनाइ छ।

स्थानीय युवाहरूले आफूहरूको विरोध कुनै व्यक्ति विशेषविरुद्ध नभई गाउँको सरसफाइ र फोहोर व्यवस्थापनमा सम्बन्धित निकायको ध्यानाकर्षण गराउने उद्देश्यले गरिएको बताएका छन्।