अम्भु प्रसाद साह नेतृत्वको टोलीद्वारा काठमाडौंमा उच्चस्तरीय भेटघाटमा

जनकपुरधाम/साउन १० गते। रास्वपाका मधेश प्रदेश विभाग प्रमुख तथा संगठन विभागका उपप्रमुख अम्भु प्रसाद साह नेतृत्वको टोलीले पार्टीका संसदीय दलका उपनेता गणेश पराजुलीसँग भेटघाट गर्दै धनुषाको संगठनात्मक अवस्था, आगामी कार्यदिशा तथा जिल्लालाई अझ प्रभावकारी बनाउने विषयमा विस्तृत छलफल गरेको हो।

भेटका क्रममा स्थानीय तहदेखि जिल्ला तहसम्म संगठनलाई थप सक्रिय र सशक्त बनाउने, सदस्यता विस्तार गर्ने तथा आगामी राजनीतिक गतिविधिलाई प्रभावकारी रूपमा सञ्चालन गर्ने विषयमा विचार आदानप्रदान भएको जनाइएको छ।

यसैबीच, धनुषा निर्वाचन क्षेत्र नम्बर–३ अन्तर्गतका ३८ वटै वडाको सहभागिता रहने गरी आयोजना गर्न लागिएको एमपी कप क्रिकेट प्रतियोगिता सम्बन्धमा नेपाल क्रिकेट संघ (क्यान) का केन्द्रीय उपाध्यक्ष रोशन सिंहसँग पनि सृजनात्मक छलफल गरिएको छ।

छलफलमा प्रतियोगिताको मिति, प्रारूप (फर्म्याट) तथा आवश्यक तयारीबारे दशैंलगत्तै अन्तिम निर्णय गरिने सहमति भएको बताइएको छ। साथै, क्षेत्र नम्बर–३ अन्तर्गतका ३८ वटै वडाका क्रिकेट खेलाडीलाई प्रतियोगिताका लागि समयमै तयारीमा जुट्न आग्रह गरिएको छ।

त्यसैगरी, रास्वपाका केन्द्रीय सदस्य शंकर श्रेष्ठसँग भएको भेटमा धनुषा तथा मधेश प्रदेशको तहगत र संरचनागत संगठनको वर्तमान अवस्था, पार्टीको आन्तरिक व्यवस्थापन तथा समसामयिक राजनीतिक विषयमा समेत विस्तृत छलफल भएको छ।

छलफलपछि श्रावण महिनाको अन्तिम सातादेखि पालिका तहदेखि प्रदेश तहसम्म देखिएका संगठनात्मक विवादलाई समन्वय, संवाद र सहकार्यका माध्यमबाट समाधान गर्दै पार्टीलाई अझ सुदृढ, व्यवस्थित र प्रभावकारी बनाउने विषयमा सबै पक्ष एकमत भएको जनाइएको छ।