जनकपुरधाम/असार ३२ गते। जनकपुर क्षेत्रका जेन–जेड युवा नेता तथा कानूनका विद्यार्थी मोहम्मद नइम राईन ले बंगलादेशका एक अन्तर्राष्ट्रिय सञ्चारमाध्यमका पत्रकारसँगको अन्तर्वार्तामा आफ्नो नेतृत्व विकास, शिक्षा प्रणाली सुधार तथा मदरसा शिक्षाको मान्यताबारे धारणा व्यक्त गरेका छन्।
“नेपालका लाखौँ मुस्लिम विद्यार्थी मदरसामा अध्ययन गरिरहेका छन्। उनीहरूको शिक्षालाई राष्ट्रिय शिक्षा प्रणालीसँग जोड्न र समान अवसर सुनिश्चित गर्न मदरसा शिक्षा बोर्ड गठन गरिनुपर्छ,” उनले भने।
अन्तर्वार्ताका क्रममा राईनले आफ्नो नेतृत्व यात्राको सुरुवात विद्यालय जीवनमै भएको बताए। उनका अनुसार विद्यालयको युवा क्लबसँग आबद्ध भएर लैङ्गिक समानता, जातीय विभेद, हिंसा न्यूनीकरण तथा सामाजिक न्यायका विषयमा विभिन्न कार्यक्रम र प्रशिक्षणमा सहभागी हुने अवसर प्राप्त भएको थियो।
“हामी समुदायमा गएर सडक नाटक, जनचेतनामूलक कार्यक्रम तथा सामाजिक अभियान सञ्चालन गर्थ्यौं। त्यसैले मैले नेतृत्व, सार्वजनिक बोलाइ र सामाजिक मुद्दामा आवाज उठाउने आत्मविश्वास त्यहीँबाट प्राप्त गरेको हुँ,” राईनले बताए।
उनले नेपालमा विद्यार्थीको सर्वाङ्गीण विकासका लागि पाठ्यपुस्तकमा मात्र सीमित नभई अतिरिक्त क्रियाकलापलाई प्राथमिकता दिनुपर्ने धारणा व्यक्त गरे।
“विद्यार्थीलाई केवल किताब पढाएर मात्र हुँदैन। खेलकुद, वक्तृत्वकला, गायन, नेतृत्व विकास तथा दैनिक जीवनमा आवश्यक सीप सिकाउने कार्यक्रम सञ्चालन गरिनुपर्छ। सिकाइलाई रमाइलोसँग जोड्न सकियो भने विद्यार्थीको क्षमता अझ राम्रोसँग विकास हुन्छ,” उनले भने।
अन्तर्वार्ताका क्रममा राईनले मदरसा शिक्षाको विषय पनि उठाएका थिए। मुस्लिम समुदायका सदस्यका रूपमा आफूले पनि केही वर्ष मदरसामा अध्ययन गरेको अनुभव सुनाउँदै उनले नेपालमा मदरसा शिक्षालाई औपचारिक मान्यता दिन आवश्यक रहेको बताए।
“नेपालका लाखौँ मुस्लिम विद्यार्थी मदरसामा अध्ययन गरिरहेका छन्। उनीहरूको शिक्षालाई राष्ट्रिय शिक्षा प्रणालीसँग जोड्न र समान अवसर सुनिश्चित गर्न मदरसा शिक्षा बोर्ड गठन गरिनुपर्छ,” उनले भने।
उनका अनुसार मदरसा शिक्षा व्यवस्थित र मानकीकरण भएमा त्यहाँ अध्ययन गर्ने विद्यार्थीहरूले पनि सरकारी सेवा, उच्च शिक्षा तथा अन्य अवसरहरूमा समान पहुँच प्राप्त गर्न सक्नेछन्। साथै उर्दू शिक्षाले समेत राज्यबाट उचित मान्यता पाउनेछ।
राईनले नेपालका युवाहरू सामाजिक परिवर्तनका महत्वपूर्ण संवाहक रहेको उल्लेख गर्दै नेतृत्व विकासका अवसरहरू विद्यालय, समुदाय र समाजका विभिन्न तहमा विस्तार गर्नुपर्नेमा जोड दिए।
“आजका युवाहरू केवल भविष्यका नेता होइनन्, वर्तमानका परिवर्तनकर्ता पनि हुन्। युवालाई अवसर, सहभागिता र विश्वास दिइयो भने उनीहरूले समाज र राष्ट्र निर्माणमा महत्वपूर्ण योगदान दिन सक्छन्,” उनले अन्तर्वार्तामा बताएका छन्।
Discussion about this post