काठमाडौँ/असोज २९ गते। टेलिभिजन एकेडेमीसँगको नयाँ ६ वर्षे सम्झौताअनुसार एमी अवार्ड्स २०२७ देखि २०३२ सम्म प्राइम भिडियोमार्फत विशेष रूपमा प्रसारण हुने भएको छ।
यो सम्झौताले पुरस्कारको ७९ वर्षे इतिहासमा पहिलो पटक एमी अवार्ड्स परम्परागत प्रसारण टेलिभिजनमा नआउने संकेत गरेको छ। यो कार्यक्रम विश्वव्यापी रूपमा उपलब्ध हुनेछ र प्राइम सदस्यता बिना नै दर्शकहरूले निःशुल्क रूपमा हेर्न सक्नेछन्।
प्राइम भिडियोले ‘हल अफ फेम’ र ‘टेलिभिजन एकेडेमी सम्मान’ समारोहलगायत अन्य टेलिभिजन एकेडेमी कार्यक्रमहरू पनि स्ट्रिम गर्न सक्नेछ। यद्यपि, ‘क्रिएटिभ आर्ट्स एमी’ को लागि भने प्लेटफर्म अझै घोषणा गरिएको छैन।
टेलिभिजन एकेडेमीका अध्यक्ष क्रिस अब्रेगोले ‘द हलिउड रिपोर्टर’ लाई बताए अनुसार यस सम्झौताले अघिल्लो सम्झौता नवीकरण गर्नुको सट्टा प्रसारण मोडेलमा पुनर्विचार गर्ने अवसर प्रदान गरेको छ। उनका अनुसार चार प्रमुख अमेरिकी प्रसारण नेटवर्कबीचको वार्षिक रोटेशनको अर्थ प्रायः नयाँ साझेदारसँग फेरि सुरुवात गर्नु हो, जसले उत्पादकहरू, रचनात्मक निर्णयहरू र ब्रान्ड साझेदारीहरूलाई असर गर्ने गर्दछ।
एमी अवार्ड्स यसअघि एबीसी, सीबीएस, फक्स र एनबीसीमा प्रसारण भइसकेका छन्। सन् २०२६ को प्राइमटाइम एमी अवार्ड्स सेप्टेम्बर १४ मा एनबीसीमा प्रसारित भएको थियो भने पिककले स्ट्रिमिङ पार्टनरको रूपमा काम गरेको थियो।
स्मरण रहोस्, यो कदम २०२९ मा एकेडेमी अवार्ड्सको युट्युबमा हुने योजनाबद्ध संक्रमणपछिको अर्को ठूलो निर्णय हो। एबीसीसीले २०२८ सम्म ओस्कर प्रसारण भने जारी राख्नेछ।
Discussion about this post