राजपाल यादवले भनेका थिए, ‘बरु ५ पटक जेल जान्छु, पैसा तिर्दिन्

काठमाडौं/ ३० असार । दिल्ली उच्च अदालतले ‘चेक बाउन्स’ सम्बन्धी मुद्दामा राजपाल यादवलाई पुनः जेल सजाय सुनाएको छ। अब उनले तीन महिना जेलमा बिताउनु पर्नेछ।

यसका साथै, उनले र उनकी श्रीमती राधा राजपाल यादव दुवैले ७ वटा मुद्दामा वादी पक्ष अर्थात मुर्ली प्रोजेक्ट्स प्रालिलाई क्षतिपूर्ति तिर्नुपर्ने भएको छ। राजपाललाई किन जेल पठाइयो भन्नेबारे सोध्दा मुर्ली प्रोजेक्ट्सका वकिलले एउटा महत्त्वपूर्ण कुरा खुलासा गरे, राजपालले अदालतसमक्ष भनेका थिए कि विपक्षी पक्षलाई एक रुपैयाँ पनि तिर्नुभन्दा बरु ५ पटक जेल जानु नै उनलाई स्वीकार्य छ।

दिल्ली उच्च अदालतको फैसला पछि मुरली प्रोजेक्ट्सको प्रतिनिधित्व गर्ने वकिल अवनीश सिक्काले सो कुरा खुलासा गरेका हुन । उनले बताए अनुसार राजपाल यादवले यस मामिलामा कुल २१ वटा मुद्दा दायर गरेका थिए तर उच्च अदालतले ती सबै खारेज गर्दै सेसन्स कोर्टको अघिल्लो निर्णयलाई नै सदर गर्‍यो। र, दालतले राजपाललाई तीन महिनाको जेल सजाय सुनाएको छ।

साथै, उनले आफूविरुद्ध चलिरहेका प्रत्येक मुद्दामा १ करोड ५ लाख रुपैयाँ जरिवाना तिर्नुपर्नेछ। ‘बार एण्ड बेन्च’का अनुसार अदालतले राजपालको आचरणलाई ‘शंकास्पद’ समेत भनेको छ।

अधिवक्ता सिक्काका अनुसार अदालतले फैसला सुनाउने क्रममा राजपालका वकिलले उनलाई प्रोबेस अर्थात परीक्षण अवधिमा रहने गरी दिइने छुटको सुविधा दिन माग गरेका थिए। सरल शब्दमा भन्नु पर्दा उनले न्यायाधीशसमक्ष राजपाललाई कैद सजायबाट छुट दिन वा त्यसको सट्टा निगरानीमा राख्न अनुरोध गरेका थिए।

तर, अदालतले यो आग्रहलाई स्वीकार गरेन। न्यायाधीश स्वर्ण कान्ता शर्माले राजपालले यसअघि पनि अदालतसमक्ष गरेका प्रतिबद्धताहरू पटक(पटक पूरा नगरेको कुरा औंल्याउँदै उनलाई थप कुनै छुट दिन नसकिने बताइन्। विशेष गरी, अधिवक्ता सिक्काले बताएको सबैभन्दा आश्चर्यजनक विवरण सुनुवाइको अन्तिम दिनसँग सम्बन्धित छ।

उनीहरूका अनुसार राजपालले त्यसबेला अदालतसमक्ष आफैं यसो भनेका थिए, ‘म पाँच पटक जेल जान तयार छु तर एक पैसा पनि तिर्ने छैन् ।’

अदालतले यी सबै पक्षलाई ध्यानमा राखेर आफ्नो फैसला सुनाएको छ। यस सम्पूर्ण प्रकरणमा राजपालविरुद्ध ७ वटा मुद्दा विचाराधीन छन्। प्रत्येक मुद्दामा उनलाई १ करोड ५ लाख रुपैयाँ जरिवाना तोकिएको छ। यसैबीच, उनकी श्रीमती राधा राजपाल यादवले पनि प्रत्येक मुद्दामा ५ लाख रुपैयाँभन्दा बढी जरिवाना तिर्नु पर्नेछ। अदालतले राजपाललाई सातवटै मुद्दामा कैदको सजाय सुनाएको छ तर यी सजायहरू एकैसाथलागू हुनेछन् अर्थात् उनले प्रत्येक मुद्दाका लागि छुट्टाछुट्टै अवधि कैद भुक्तान गर्नुपर्ने छैन्।

सुरुमा उनलाई ६ महिनाका लागि जेल पठाउने योजना भए पनि अदालतले हाल उक्त सजायलाई तीन महिनामा सीमित गरेको छ। यद्यपि, यदि उनले यस अवधिभित्र रकम चुक्ता गर्न नसकेमा उनले ६ महिनासम्म कैद भोग्नुपर्ने हुन सक्छ।