धनुषामा उपमेयर सवार गाडी र एम्बुलेन्स ठोक्किँदा ८ जना घाइते

धनुषा/असार २७ गते। धनुषाको मिथिला नगरपालिका–९ बडहरीस्थित पूर्व–पश्चिम लोकमार्गमा शनिबार बिहान उपमेयर सवार सरकारी गाडी र बिरामी बोकेको एम्बुलेन्स एकापसमा ठोक्किँदा ८ जना घाइते भएका छन्।

नेपाल प्रहरीका अनुसार बिहान करिब ६:२० बजे बडहरीबाट विराटनगरतर्फ बिरामी लिएर जाँदै गरेको ना.२ च २३२ नम्बरको एम्बुलेन्स र ढल्केवरबाट बर्दिबासतर्फ जाँदै गरेको प्रदेश २–०२–००१ झ ००८२ नम्बरको सरकारी गाडी एकापसमा ठोक्किएका हुन्। सरकारी गाडीमा धनुषाधाम नगरपालिकाकी उपमेयर विद्दा भुजेल सवार थिइन्।

दुर्घटनामा एम्बुलेन्स चालकसहित एम्बुलेन्समा रहेका पाँच जना र सरकारी गाडीमा रहेका तीन जना गरी कुल ८ जना घाइते भएका छन्। घाइते सबैलाई उपचारका लागि जानकी मेडिकल कलेज, रमदैया, धनुषा पठाइएको प्रहरीले जनाएको छ।

घाइतेमध्ये एम्बुलेन्स चालक दिपेन्द्र कुमार महतो, बसन्त कुमार सिंह, राजु देवी र लक्ष्मी महतोको अवस्था सामान्य रहेको छ भने रेणु कुमारी महतोको अवस्था मध्यम रहेको प्रहरीले जनाएको छ। सरकारी गाडी चालक बद्री भुजेल, उपमेयर विद्यादेवी भुजेल र भीमराज भुजेलको अवस्था पनि सामान्य रहेको बताइएको छ। प्रहरीले दुर्घटनाको कारणबारे थप अनुसन्धान भइरहेको जनाएको छ।