कृषि, शिक्षा र स्वास्थ्यलाई प्राथमिकता दिँदै मटिहानी नगरपालिकाद्वारा ४७ करोड ४५ लाखको बजेट सार्वजनिक

महोत्तरी/असार ३ गते। महोत्तरीको मटिहानी नगरपालिकाले आर्थिक वर्ष २०८३/०८४ का लागि ४७ करोड ४५ लाख रुपैयाँको बजेट सार्वजनिक गरेको छ। नगरपालिकाको १७औँ नगरसभामा नगरप्रमुख हरिप्रसाद मण्डलले आगामी आर्थिक वर्षको नीति तथा कार्यक्रमसहित बजेट प्रस्तुत गरेका हुन्।

प्रस्तुत बजेटअनुसार राजस्व बाँडफाँडबाट १० करोड ५७ लाख रुपैयाँ, संघीय सरकारबाट २८ करोड ८८ लाख रुपैयाँ, प्रदेश सरकारबाट १ करोड ४९ लाख ९५ हजार रुपैयाँ तथा आन्तरिक स्रोतबाट ६ करोड ५६ लाख रुपैयाँ प्राप्त हुने अनुमान गरिएको छ।

नगरप्रमुख मण्डलले कृषि, शिक्षा र स्वास्थ्य क्षेत्रलाई बजेटको मुख्य प्राथमिकतामा राखिएको जानकारी दिए। साथै मटिहानीको धार्मिक, ऐतिहासिक तथा पर्यटकीय महत्वलाई प्रवर्द्धन गर्ने उद्देश्यले विभिन्न विकास योजनाहरू सञ्चालन गरिने नीति तथा कार्यक्रममा उल्लेख गरिएको छ।

नगरसभालाई सम्बोधन गर्दै मधेश प्रदेशसभा सभामुख रामअशिष यादव ले संघीय सरकारले प्रदेश र स्थानीय तहलाई कमजोर बनाउने नीति अवलम्बन गरिरहेको आरोप लगाए। उनले प्रदेश र स्थानीय तहलाई स्वायत्त सरकारका रूपमा नभई संघीय सरकारका निकायसरह व्यवहार गर्ने प्रवृत्तिले संघीय व्यवस्थामाथि नै प्रश्न उठाएको बताए।

सभामुख यादवले मटिहानी नगरपालिकाले सीमित स्रोतसाधनका बाबजुद प्रभावकारी काम गरिरहेको उल्लेख गर्दै प्राप्त अनुदान अपेक्षाकृत कम रहेको बताए। उनले मानव विकास सूचकांक लगायतका आधारलाई बेवास्ता गर्दै संघीय सरकारले अधिकांश बजेट आफ्नै मातहत राख्ने गरेको भन्दै असन्तुष्टि व्यक्त गरे।

नगरसभाबाट पारित नीति तथा कार्यक्रममा समावेशीकरण, गरिबी निवारण, कला तथा संस्कृति संरक्षण, खेलकुद विकास, पूर्वाधार निर्माण, सिँचाइ, भवन तथा सहरी विकास, सञ्चार, वातावरण संरक्षण तथा विपद् व्यवस्थापनलगायतका क्षेत्रलाई समेटिएको छ। नगरपालिकाले आगामी वर्ष यी क्षेत्रहरूमा केन्द्रित भएर विकासका कार्यक्रम सञ्चालन गर्ने जनाएको छ।