ग्यास बिक्रेता संघको धनुषाको छैटौँ साधारणसभा जनकपुरधाममा सम्पन्न

धनुषा/जेठ ३० गते । ग्यास बिक्रेता संघ धनुषाको छैटौँ वार्षिक साधारणसभा ग्यास आपूर्तिमा देखिएको समस्या, व्यवसायीहरूको हकहित, संघको आर्थिक तथा सांगठनिक अवस्थाबारे छलफल गर्दै जनकपुरधाममा सम्पन्न भएको छ।

साधारणसभामा खाना पकाउने एलपी ग्यासको आपूर्तिमा देखिएको अभाव, जिल्लाका ग्यास बिक्रेताले भोगिरहेका चुनौती, व्यवसाय संरक्षण तथा आगामी कार्ययोजनाका विषयमा व्यापक समीक्षा गरिएको थियो।

कार्यक्रमका अध्यक्ष तथा ग्यास बिक्रेता संघ धनुषाका अध्यक्ष फुलदेव पण्डित ले आफ्नो मन्तव्यमा पछिल्लो समय ग्यास आपूर्तिमा देखिएको समस्याका बाबजुद संघले सम्बन्धित निकाय तथा ग्यास उद्योगहरूसँग निरन्तर समन्वय गरी उपभोक्तासम्म ग्यास उपलब्ध गराउन प्रयास गरेको बताए।

उनले भने, “संघको उद्देश्य हासिल गर्न नीतिगत अभाव भए पनि सम्बन्धित निकाय र ग्यास उद्योगहरूसँग समन्वय गरेर जिल्लावासीलाई ग्यास उपलब्ध गराउने प्रयास गरेका छौँ। नोबेल ग्यास कम्पनीले धनुषामा सबैभन्दा बढी ग्यास वितरण गरेको छ र हरेक सम्भव प्रयास गरेको भए पनि आपूर्ति अभावको समस्या पूर्ण रूपमा समाधान हुन सकेको छैन।”

पण्डितले आफ्नो कार्यकालमा संघले व्यवसायीहरूको अपेक्षा सम्बोधन गर्न र संगठनलाई थप मजबुत बनाउन प्रयास गरेको उल्लेख गर्दै आगामी दिनमा पनि व्यवसायीहरूको हकहितका लागि आवाज उठाइरहने प्रतिबद्धता व्यक्त गरे। उनले संघका पदाधिकारी, सल्लाहकार, सदस्य तथा सम्पूर्ण ग्यास व्यवसायीहरूको सहयोगप्रति आभार व्यक्त गर्दै व्यवसायीबीच एकता र सहकार्य अझ सुदृढ बनाउनुपर्नेमा जोड दिए।

साधारणसभामा ग्यास बिक्रेता महासंघका केन्द्रीय अध्यक्ष ज्ञानेश्वर अर्याल प्रमुख अतिथिका रूपमा सहभागी भएका थिए। कार्यक्रममा नोबेल ग्यासका प्रबन्धक मनोज श्रेष्ठ, नेपाल ग्यासका प्रबन्धक रामकृष्ण सापकोटा, संघका पदाधिकारी, सदस्य तथा जिल्लाभरका ग्यास बिक्रेताहरूको उपस्थिति रहेको थियो।

कार्यक्रममा संघका कोषाध्यक्ष पुरुषोत्तम प्रसाद साह ले आर्थिक वर्ष २०८१/८२ को लेखा परीक्षण प्रतिवेदन तथा आर्थिक वर्ष २०८२/८३ का लागि अनुमानित आय–व्यय बजेट प्रस्तुत गरेका थिए। उनले संघको आर्थिक अवस्था सन्तोषजनक रहेको र सदस्यहरूको विश्वास, सहयोग तथा सहभागिताले संस्थाको विकासमा महत्वपूर्ण योगदान पुगेको बताए।

साधारणसभाले ग्यास आपूर्तिलाई व्यवस्थित, सुरक्षित र उपभोक्तामैत्री बनाउन व्यवसायीबीच समन्वय बढाउने, सुरक्षा सचेतना कार्यक्रम सञ्चालन गर्ने तथा देखिएका समस्याको समाधानका लागि सम्बन्धित निकायसँग प्रभावकारी पहल गर्ने निर्णय गरेको संघले जनाएको छ।