गिरिजानन्द साह/पुस १५ गते। महिला पतञ्जली योग साधना केन्द्र कदमचोक जनकपुरधामको आयोजनामा आजदेखि १५ दिवसीय सहयोग शिक्षण तालिम सुरु भएको छ। डायबिटिज, थाइराइड, दम्मा, सर्दी, खोकी तथा एलर्जीजस्ता रोगहरूलाई जरैबाट नियन्त्रण तथा निको पार्ने उद्देश्यले योग लाभ केन्द्रित तालिमको आयोजना गरिएको हो।
तालिमको प्रशिक्षकको रूपमा प्रमिला महासेठ रहेकी छन्। तालिममा १५ जना महिला प्रशिक्षार्थीहरूको सहभागिता रहेको महिला पतञ्जली योग साधना केन्द्रकी नगर अध्यक्ष मञ्जिता सहनीले जानकारी दिइन्।
तालिमको उद्देश्यबारे प्रकाश पार्दै नगर अध्यक्ष सहनीले घर–घरमा महिलाले नियमित योग अभ्यास गरी परिवारका प्रत्येक सदस्यलाई योगतर्फ प्रेरित गरून् भन्ने लक्ष्यका साथ १५ दिवसीय सहयोग शिक्षण तालिम सञ्चालन गरिएको बताइन्।
उनले भनिन्, “योग अभ्यासले शरीरलाई तन्दुरुस्त राख्नुका साथै मानसिक तनाव, चिन्ता र अवसादजस्ता समस्याबाट मुक्ति दिलाउन सहयोग पुर्याउँछ। योगासन, प्राणायाम तथा ध्यान अभ्यासले रक्तसञ्चार, पाचन प्रणाली र रोग प्रतिरोधात्मक क्षमतामा उल्लेखनीय सुधार ल्याउँछ।”
Discussion about this post