काठमाडौं/मंसिर १८ गते । नेकपा (एमाले) ले ११औं राष्ट्रिय महाधिवेशनको उद्घाटन सत्रमा १० हजार स्वयंसेवक परिचालन गर्ने जनाएको छ।
स्वयंसेवक परिचालन समिति संयोजक भानुभक्त ढकालका अनुसार उद्घाटनको खुला सत्रमा ठूलो सहभागिता हुने भएकाले १० हजार स्वयंसेवक खटाइनेछ। उनले बन्दसत्रमा करिब ५०० स्वयंसेवक परिचालन गरिने जानकारी दिए।
एमालेको ११औं महाधिवेशनको उद्घाटन कार्यक्रम मंसिर २७ गते भक्तपुरको सल्लाघारीस्थित खुल्लाचौरमा तथा बन्दसत्र काठमाडौंको भृकुटीमण्डपमा हुने तय भएको छ।
ढकालका अनुसार स्वयंसेवकहरू पार्टीका २४ जनसंगठन तथा विभिन्न कमिटीबाट खटाइनेछन्। एमालेले हालै गठन गरेको राष्ट्रिय स्वयंसेवक फोर्सले पनि समन्वय गर्नेछ।
उद्घाटन समारोहका लागि मञ्च व्यवस्थापन, शौचालय तथा आवश्यक पूर्वाधार निर्माणमा स्वयंसेवक परिचालन भइसकेको एमालेले जनाएको छ।
एमाले महाधिवेशन मंसिर २७ देखि २९ गतेसम्म चल्नेछ। महाधिवेशनमा आयोजक र निर्वाचित गरी २ हजार ४०० प्रतिनिधि रहनेछन्।
Discussion about this post