जनकपुरधाम/मङ्सिर १७गते। मधेश प्रदेशका मुख्यमन्त्री सरोज कुमार यादवले दिएको राजीनामा प्रदेश प्रमुख डा. सुरेन्द्र लाभ कर्णले स्वीकृत गरेका छन्। सर्वोच्च अदालतले २४ घण्टाभित्र विश्वासको मत लिन आदेश दिएको भोलिपल्ट उनले बुधबार प्रदेश प्रमुखसमक्ष राजीनामा बुझाएका थिए।
प्रदेश प्रमुख कार्यालयले जारी गरेको विज्ञप्तिअनुसार संविधानको धारा १६९(१) ‘क’ बमोजिम यादवको राजीनामा स्वीकार गरिएको छ। सोही धारा तथा प्रावधानअनुसार अब प्रदेशसभामा बहुमत जुटाउन सक्षम दल वा सांसदलाई नयाँ सरकार गठनका लागि दाबी पेस गर्ने अधिकार रहनेछ।
विज्ञप्तिमा भनिएको छ, “माननीय मुख्यमन्त्री श्री सरोज कुमार यादवद्वारा पेश गरिएको राजीनामा स्वीकार भएको जानकारी गराइन्छ। नेपाल संविधानको धारा १६८(२) बमोजिम दुई वा दुईभन्दा बढी दलहरूको समर्थनमा बहुमत प्राप्त गर्न सक्ने सदस्यलाई दाबी पेश गर्न आह्वान गरिएको छ।” यसका लागि मङ्सिर १९ गते शुक्रबार साँझ ५ बजेसम्मको समय तोकिएको छ।
यादव नेतृत्वको सरकार नियुक्तिको सुरुदेखिनै विवादमा परेको थियो। सर्वोच्च अदालतले उनको नियुक्ति प्रक्रियालाई असंवैधानिक ठहर गर्दै अविलम्ब विश्वासको मत लिन आदेश दिएको थियो। आवश्यक समर्थन संख्या जुटाउन नसकिने देखिएपछि यादवले पदबाट अलग हुने निर्णय लिएका हुन्।
उनको राजीनामासँगै मधेश प्रदेशमा नयाँ राजनीतिक शक्ति–सन्तुलन निर्माण हुने संकेत देखिएको छ। अब कुन दल वा गठबन्धनले बहुमत हासिल गर्दै सरकार गठन गर्छ भन्ने विषयले प्रदेशको आगामी राजनीतिक दिशा निर्धारण गर्नेछ।
Discussion about this post