जनकपुरधाम। मधेश प्रदेशमा सेवा गुणस्तरका आधारमा हुने वार्षिक मूल्यांकनमा गौरस्थित प्रादेशिक अस्पताल लगातार दोश्रो वर्ष उत्कृष्ट घोषित भएको छ। मधेश प्रदेश स्वास्थ्य मन्त्रालय अन्तर्गत न्यूनतम सेवा मापदण्ड कार्यान्वयन कार्यक्रमअन्तर्गत गरिएको अनुगमन–मूल्यांकनपछि अस्पताललाई प्रदेशमै उत्कृष्ट ठहर गरिएको हो।
तीन दिने प्रदेशस्तरीय वार्षिक समीक्षा गोष्ठीको समापन कार्यक्रममा स्वास्थ्य निर्देशनालयका निर्देशक सरोजचन्द्र न्यौपानेले कुल ९१ प्रतिशत अंक ल्याएर गौर प्रादेशिक अस्पताल सातवटै प्रादेशिक अस्पतालमध्ये पहिलो स्थानमा आएको जानकारी दिए। यसअघि आर्थिक वर्ष २०८०/८१ मा पनि गौर अस्पताल उत्कृष्ट घोषित भएको थियो।
मूल्यांकनका लागि अस्पतालको सेवा वितरण, चिकित्सक तथा स्वास्थ्यकर्मीको उपस्थिति र व्यवहार, भौतिक पूर्वाधार, एम्बुलेन्स सेवा, क्यान्टिन, बेड व्यवस्थापन, अपरेशन कक्ष, सरसफाइ, शौचालयको अवस्था र बिरामीलाई प्रदान गरिने सुविधालाई आधार बनाइएको थियो। सोही मूल्यांकनअनुसार जलेश्वर अस्पताल ८० प्रतिशत अंकसहित दोस्रो र सिरहा अस्पताल ७८ प्रतिशतसहित तेस्रो स्थानमा परे। मधेश स्वास्थ्य विज्ञान प्रतिष्ठान मातहतको प्रादेशिक अस्पताल जनकपुर भने ५० प्रतिशत अंकसहित पुछारमा रह्यो। समारोहमा मुख्यमन्त्री सरोजकुमार यादवले उत्कृष्ट भएका अस्पतालका मेडिकल सुप्रिटेन्डेन्ट तथा स्वास्थ्यकर्मीलाई दोसल्ला र सम्मानपत्र प्रदान गरेका थिए।
पालिकातर्फ सर्लाही जिल्ला प्रदेशमै उत्कृष्ट ठहरिएको छ। १३६ पालिकामध्ये सर्लाहीको लालबन्दी नगरपालिका ९९.०३ प्रतिशत अंकसहित पहिलो स्थानमा रह्यो। त्यस्तै हरिपुर नगरपालिका दोस्रो, विष्णुपुर गाउँपालिका तेस्रो, हरिवन नगरपालिका चौथो र बसबरिया गाउँपालिका पाँचौं स्थानमा परे।
स्वास्थ्य कार्यालयतर्फ पर्सा जिल्ला प्रथम, सर्लाही द्वितीय र महोत्तरी तृतीय भएका छन्। आयुर्वेद सेवातर्फ पर्सा जिल्ला पहिलो, बारा दोस्रो र महोत्तरी तेस्रो स्थानमा परे। संस्थागत अस्पतालमध्ये बर्दिबास अस्पताललाई पहिलो घोषित गरिएको छ। कार्यक्रमको अन्त्यमा उत्कृष्ट काम गरेको संस्थासँगै स्वास्थ्यकर्मी र कर्मचारीलाई पनि सम्मान गरिएको थियो।
Discussion about this post