गिरिजानन्द साह/जनकपुरधाम/साउन १५ गते। सुरक्षा र न्याय कार्यक्रम अन्तर्गत लैंगिक हिंसा रोकथाम तथा प्रतिकार्य सम्बन्धमा निर्माण गरिएका प्रादेशिक ऐन, नीति तथा रणनीतिक कार्ययोजनामा भएका व्यवस्था र तिनको कार्यान्वयन अवस्थाबारे समिक्षा तथा छलफल गर्न मधेश प्रदेशस्तरीय दुई दिने कार्यशाला जनकपुरधाममा सुरु भएको छ।
मधेश प्रदेश सरकारअन्तर्गत खेलकुद तथा समाज कल्याण मन्त्रालय, जनकपुरधामको आयोजनामा तथा पीपुल इन नीड र हामी दाजुभाई संस्थाको सहकार्यमा सुरु गरिएको यो कार्यशालामा सम्बन्धित सरकारी निकायका प्रतिनिधिहरू, मानव अधिकारकर्मी, महिला अधिकारकर्मी, कानुनविद्, सुरक्षाकर्मी तथा नागरिक समाजका अगुवाहरूको सहभागीता रहेको छ।
कार्यशालामा लैंगिक हिंसा सम्बन्धी हालसम्मको कानुनी प्रगति, नीति तथा रणनीतिहरूको प्रभावकारिता, कार्यान्वयनमा देखिएका चुनौतीहरू तथा सुधारका सम्भावनाबारे गहन छलफल भइरहेको छ। सहभागीहरूले प्रदेशस्तरीय नीति तथा कार्यक्रमलाई अझ प्रभावकारी र व्यवहारमैत्री बनाउनेतर्फ ध्यान दिनुपर्ने धारणा राखेका छन्।
कार्यशालाको उद्घाटन सत्रमा बोल्दै मन्त्रालयका प्रतिनिधिले सरकार लैंगिक हिंसा विरुद्ध शून्य सहनशीलताको नीतिमा प्रतिबद्ध रहेको र आगामी दिनमा अझ प्रभावकारी कार्यक्रम तथा कानुनी कार्यान्वयन सुनिश्चित गरिने बताएका छन्। दुई दिनसम्म चल्ने उक्त कार्यशालामा नीति निर्मातादेखि grassroots तहमा कार्यरत संघसंस्थासम्मका प्रतिनिधिहरूको सक्रिय सहभागिता रहनेछ। कार्यशालाको निष्कर्षले आगामी दिनमा अझ प्रभावकारी नीति निर्माण र कार्यान्वयनमा टेवा पुग्ने अपेक्षा गरिएको छ।
Discussion about this post