धान रोपाइ कार्यक्रमसहित २२औँ राष्ट्रिय धान दिवस जनकपुरधाममा सम्पन्न

गिरिजानन्द साह/जनकपुरधाम/असार १५ गते । २२औँ राष्ट्रिय धान दिवसको अवसरमा जनकपुरधाम उपमहानगरपालिकाले धान रोपाइ कार्यक्रम सञ्चालन गर्दै दिवस मनाएको छ। “धान बालीमा संघनता खाद्य सुरक्षा र आत्मनिर्भरता” नाराको साथ आनन्द नेपाल संस्थाको सहकार्यमा उपमहानगरपालिकाले जनकपुरधामको नोचा चौरीमा धान रोपाइ कार्यक्रम आयोजना गरेको हो।

कार्यक्रमका प्रमुख अतिथि नगरप्रमुख साहले धानलाई मुलुकको अर्थतन्त्रको मेरुदण्डको रूपमा चित्रण गर्दै स्थानीय तहले धान उत्पादन वृद्धि र आत्मनिर्भरता हासिल गर्न निरन्तर प्रयास गरिरहेको जानकारी दिनुभयो।

“धानमा हाम्रो परनिर्भरता हटाउन खेती विस्तार र उत्पादकत्व वृद्धिमा ध्यान दिनु जरुरी छ,” उहाँले भन्नुभयो। उहाँले कमला सिँचाइ आयोजना तत्काल अघि बढाउन संघ सरकारसँग आग्रह गर्दै सिँचाइ अभावका कारण धान उत्पादनमा असर परेको उल्लेख गर्नुभयो। साथै, मल आपूर्ति समयमै सुनिश्चित गर्नुपर्नेमा पनि उहाँले जोड दिनुभयो।

कार्यक्रममा सहभागी किसानहरूले यस्तो कार्यक्रममा सहभागी हुन पाउँदा गर्व महसुस भएको बताए। उनीहरूले सरकारलाई कृषकमैत्री नीति कार्यान्वयनमा तीव्रता दिन आग्रहसमेत गरे।

कार्यक्रमको नेतृत्व जनकपुरधाम उपमहानगरपालिकाका नगरप्रमुख मनोजकुमार साहले गर्नुभएको थियो। कार्यक्रममा मधेस प्रदेशसभा सदस्य रामसरोज यादव, स्थानीय जनप्रतिनिधि, किसान तथा सर्वसाधारणको उल्लेखनीय उपस्थिति रहेको थियो।