जनकपुरधाममा मुख्यमन्त्री अन्तर–प्रदेश राष्ट्रिय कबड्डी प्रतियोगिता सुरु

गिरिजानन्द साह/जनकपुरधाम/असार १२ गते। मधेश प्रदेश सरकारको आयोजनामा मुख्यमन्त्री अन्तर–प्रदेश राष्ट्रिय कबड्डी प्रतियोगिता २०८१/८२  बिहीबार देखि जनकपुरधाममा सुरु भएको छ। प्रतियोगिताको भव्य उद्घाटन मधेश प्रदेशका मुख्यमन्त्री सतिश कुमार सिंहले गर्नुभयो।

उद्घाटन समारोहमा सम्बोधन गर्दै मुख्यमन्त्री सिंहले कबड्डीजस्ता मौलिक तथा जनप्रिय खेलहरू प्रदेशको गौरव बढाउने र अन्तर्राष्ट्रिय स्तरमा पहिचान दिलाउने माध्यम बन्न सक्ने उल्लेख गर्नुभयो। साथै, खेलकुद क्षेत्रको समग्र विकासका लागि प्रदेश सरकारले आवश्यक नीति, कार्यक्रम तथा बजेट विनियोजन गर्दै आएको जानकारी दिनुभयो।

मुख्यमन्त्री सिंहले पछिल्ला वर्षहरूमा मधेशका खेलाडीहरूले राष्ट्रिय तथा अन्तर्राष्ट्रिय प्रतियोगितामा पुर्याएको योगदानको प्रशंसा गर्दै खेलकुद प्रवर्द्धनमा सरकारको निरन्तर प्रतिबद्धता रहने प्रतिवद्धता जनाउनुभयो।

कार्यक्रममा अध्यक्षता गर्नु भएका प्रदेशका खेलकुद तथा समाज कल्याण मन्त्री प्रमोद जयसवालले “खेलौँ मधेश, जितौँ मधेश” अभियान अन्तर्गत आगामी वर्षहरूमा थप ठूला कार्यक्रमहरू सञ्चालन गरिने जानकारी दिनुभयो। उहाँले मधेशमा खेलकुदको वातावरण विस्तार हुँदै गएकोमा सन्तोष व्यक्त गर्नुभयो।

मधेश प्रदेश खेलकुद परिषद्का सदस्य–सचिव शिवजी प्रसाद कानुका अनुसार प्रतियोगितामा सातै प्रदेशबाट १२–१२ जना खेलाडी सहभागी छन्। प्रशिक्षक, व्यवस्थापक, निर्णायक, अफिसियल तथा स्वयंसेवकसहित कुल ५० जनाभन्दा बढीको सहभागिता रहनेछ।

प्रतियोगिता असार १२ देखि १४ गते (बिहीबारदेखि शनिबारसम्म) सञ्चालन हुनेछ। प्रतियोगितामा प्रथम हुने टोलीलाई रु २५,०००, दोस्रो हुनेलाई रु २०,००० र तेस्रो हुने टोलीलाई रु १५,००० नगद पुरस्कार प्रदान गरिनेछ।

प्रतियोगिता प्रदेशस्तरीय खेलकुद प्रवर्द्धनका साथै स्थानीय युवाहरूमाझ खेलप्रतिको रुचि बढाउने उद्देश्यले आयोजना गरिएको आयोजकले जनाएका छ।