जनकपुरधाममा निर्जला एकादशीको अवसरमा ग्लुकोज पानी वितरण

गिरिजानन्द साह/जनकपुरधाम/जेठ २३ गते। निर्जला एकादशीको पावन अवसरमा मारवाडी युवा मञ्च जनकपुरले जनस्वास्थ्य र सेवाको भावना बोकी जनकपुरका विभिन्न स्थानहरूमा ग्लुकोज पानी तथा चिसो पिउने पानी वितरण गरेको छ।

मञ्चका अध्यक्ष राहुल सिंघानियाका अनुसार शुक्रबार सम्पन्न यस कार्यक्रममा जनकपुरको बस स्टेन्ड, भ्रमरपुरा चोक, शिव चोक, भानु चोक (दुई स्थान), हस्पिटल रोड, भुतनाथ मन्दिर, र माहावीर युवा कमिटीको सहकार्यमा राजदेवी मन्दिरअगाडी गरी जम्मा ९ स्थानमा पानी वितरण गरिएको हो।

सिंघानियाले चर्को गर्मी तथा बढ्दो तापक्रमबाट सर्वसाधारणलाई राहत मिलोस् भन्ने उद्देश्यले ग्लुकोज पानी तथा चिसो पानी वितरण गरिएको जानकारी दिए। साथै, मञ्चले यो अभियानलाई निरन्तरता दिने बताइएको छ।

यसैक्रममा, मञ्चले शनिबार जानकी मन्दिर परिसरमा बिहान ११ बजेदेखि दिउँसो १ बजेसम्म निशुल्क भोजन सेवा समेत सञ्चालन गर्ने जनाएको छ। उक्त भोजन सेवा हरेक शनिबार नियमित रूपमा आयोजना गरिने अध्यक्ष सिंघानियाले बताएका छन्।

मारवाडी युवा मञ्चको यो प्रयासले जनकपुरवासीहरूमा सकारात्मक सन्देश फैलाएको छ भने सामाजिक सेवामा युवाहरूको सहभागिता अझ प्रेरणादायी बन्न पुगेको छ।