गिरिजानन्द साह/जनकपुरधाम/बैशाख ३० गते। आसमान नेपालको आयोजना जनकपुरधाममा मधेश प्रदेश सभाका माननीय सदस्यहरूसँग विपद् जोखिम न्यूनीकरण र व्यवस्थापनसम्बन्धी एकदिने छलफल सम्पन्न भएको छ।
सो कार्यक्रम “विपद् जोखिम न्यूनीकरण र व्यवस्थापन” विषयमा केन्द्रित थियो, जसमा प्रदेशस्तरीय नीति निर्माणकर्ताहरू, जनप्रतिनिधिहरू तथा विपद् व्यवस्थापनमा संलग्न सरोकारवालाहरूको सक्रिय सहभागिता रह्यो।
कार्यक्रममा प्रख्यात विपद् व्यवस्थापन विज्ञ गंगालाल तुलाधरले मुख्य प्रस्तुती दिएका थिए। उनले नेपालको वर्तमान विपद् जोखिम अवस्थिति, अन्तर्राष्ट्रिय अभ्यास, रणनीतिक योजना, र समुदायस्तरमा गरिनुपर्ने तयारीसम्बन्धी विषयहरूमा सूक्ष्म विश्लेषण प्रस्तुत गरे। तुलाधरले जलवायु परिवर्तन, बाढी, डुबान, आगलागी, खडेरीजस्ता प्रमुख जोखिमहरूको प्रभाव र न्यूनीकरणका उपायबारे स्पष्ट जानकारी दिँदै, नीतिगत तहमा आवश्यक सुधारका प्रस्तावहरू पनि प्रस्तुत गरे।
छलफल कार्यक्रममा मधेश प्रदेश सभाका सभामुख माननीय रामचन्द्र मण्डलको प्रमुख आतिथ्यता थियो। उनले मन्तव्य दिँदै भने, “विपद् न्यूनीकरण र प्रभावकारी व्यवस्थापन कुनै एक निकायको मात्र काम होइन। यसमा सरकार, समुदाय, र नीति निर्माताबीचको समन्वय अत्यन्त जरुरी छ। प्रदेशसभा यस कार्यमा सकृय भूमिका खेल्न प्रतिबद्ध छ।”
कार्यक्रममा मधेश प्रदेश सभाका माननीय सदस्यहरू भाग्यश्री चौधरी, ललिता दास, र किरण साहसहित अन्य सदस्यहरूको समेत उल्लेखनीय उपस्थिति रहेको थियो। उनीहरूले आ-आफ्नो धारणा राख्दै मधेश प्रदेशमा बारम्बार हुने बाढी, डुबान, चुरे क्षेत्रको कटान, आगलागी, र स्वास्थ्य संकटहरूसँग जुध्न दीर्घकालीन योजना, पूर्वतयारी, जनचेतना अभिवृद्धि तथा स्रोत व्यवस्थापनमा ध्यान दिनुपर्ने आवश्यकता औंल्याए।
छलफलमा सहभागी जनप्रतिनिधिहरूले प्रदेशसभाले विपद् न्यूनीकरणसम्बन्धी विशेष कानूनी संरचना, नीति निर्माण र बजेट व्यवस्थापनमा अब थप सक्रिय भूमिका निर्वाह गर्नुपर्ने धारणा राखेका थिए। कार्यक्रममा प्रदेश सरकारका विभिन्न मन्त्रालयका प्रतिनिधिहरू, सरोकारवाला निकाय, स्थानीय तहका प्रतिनिधि, तथा संचारकर्मीहरूको समेत उपस्थिति थियो।
कार्यक्रमको समापनमा आगामी दिनमा अझ बढी सहभागीमूलक तथा कार्यान्वयनमुखी छलफल तथा तालिम कार्यक्रमहरू आयोजना गरिने प्रतिबद्धता व्यक्त गरिएको थियो।
Discussion about this post