गिरिजानन्द साह/जनकपुरधाम/वैशाख २५ गते। जनकपुरधाम उपमहानगरपालिकाको आयोजनामा तेस्रो मेयर कप टी–२० क्रिकेट प्रतियोगिता भोलि (शुक्रबार) बिहान ९ बजेदेखि जनकपुरधामको निर्माणाधीन रामजानकी बहुउद्देश्यीय रंगशालामा सुरु हुने भएको छ। बिहीबार एक पत्रकार सम्मेलनको आयोजना गर्दै प्रतियोगिता सम्बन्धी जानकारी दिईएको थियो ।
पत्रकार सम्मेलनमा जिल्ला क्रिकेट संघ धनुषाका सचिव आशिष झाले यसपटकको संस्करणमा कुल १२ टोली सहभागी हुने जानकारी दिए। उनका अनुसार प्रतियोगितामा मधेश प्रदेशका आठ जिल्लाबाट टोलीहरू सहभागी हुनेछन् भने छिमेकी मुलुक भारतबाट समेत चार टोलीले प्रतिस्पर्धा गर्नेछन्।
सचिव झाले प्रतियोगितालाई क्षेत्रीय क्रिकेटको स्तर वृद्धिका लागि महत्वपूर्ण अवसरका रूपमा व्याख्या गर्दै स्थानीय खेलाडीहरूका लागि यो राम्रो प्लेटफर्म हुने बताए। जनकपुरधाम उपमहानगरपालिकाले प्रतियोगितालाई भव्य रूपमा सम्पन्न गर्न सम्पूर्ण तयारी पूरा गरेको जनाइएको छ।
प्रतियोगिताको विजेता टिमलाई दुई लाख रुपैयाँ र उपविजेतालाई एक लाख २५ हजार रुपैयाँ पुरस्कार दिइने झाले जानकारी दिए । उनका अनुसार प्रत्येक खेलमा म्यान अफ द म्याच घोषित खेलाडीलाई केएफसीको ५ हजार रुपैयाँ बराबरको गिफ्ट भौचर, ३ हजार नगद तथा ट्रफी प्रदान गरिनेछ ।
जनकपुरधाम उपमहानगरपालिकाका प्रमुख मनोजकुमार साहले क्रिकेटलाई प्रवरद्धन गर्न अन्तर्रास्ट्रियस्तरको रंगशाला बनाउन पहल गरिरहेको बताए ।
जिल्ला क्रिकेट संघका सदस्य सरोज मिश्रको अनुसार प्रतियोगितामा उत्कृष्ट प्रदर्शन गर्ने खेलाडीहरूमध्ये वेष्ट ब्याट्सम्यान, वेष्ट बलर र म्यान अफ द सिरिजलाई नगदसहित सम्मान गरिने बताए ।
आगामी २ जेठसम्म आयोजना हुने प्रतियोगितामा ३४ लाख ७६ हजार ५५० रुपैयाँ खर्च हुने अनुमान गरिएको छ । उपमहानगरपालिकाले २० लाख रुपैयाँ सहयोग गरेको छ भने बाँकी रकम विभिन्न दातृ संस्थाको सहयोगबाट व्यवस्थापन गरिएको आयोजकले जनाएको छ ।
Discussion about this post