सिडो (CEDAW) सिफारिसहरूको कार्यान्वयनका लागि प्रदेश सरकारको भूमिका सम्बन्धी प्रादेशिक परामर्श गोष्ठी सम्पन्न

गिरिजानन्द साह/जनकपुरधाम/बैशाख ११ गते। सिडो (CEDAW) अर्थात् महिलाविरुद्ध सबै प्रकारका विभेद उन्मूलनसम्बन्धी संयुक्त राष्ट्र संघीय अभिसन्धिको सिफारिस कार्यान्वयनमा प्रदेश सरकारको भूमिकालाई स्पष्ट र प्रभावकारी बनाउन आयोजित प्रादेशिक परामर्श गोष्ठी बिहीबार जनकपुरधाममा सम्पन्न भएको छ।

गोष्ठीको प्रमुख अतिथि खेलकुद तथा समाज कल्याण मन्त्रालयकी उपसचिव देव कुमारी खत्री शर्मा रहनु भएको थियो। उहाँले सिडो सिफारिसहरूको प्रभावकारी कार्यान्वयनका लागि प्रदेश स्तरमा नीतिगत, संरचनागत र बजेटिय तयारी आवश्यक रहेको उल्लेख गर्दै स्थानीय सरकारहरूबीच समन्वय र क्षमता विकासलाई प्राथमिकता दिनुपर्ने बताउनुभयो।

कार्यक्रमको अध्यक्षता खेलकुद तथा समाज कल्याण मन्त्रालय मधेश प्रदेशका निमित्त सचिव चुडामणि फुयालले गर्नुभएको थियो। उहाँले सिडो कार्यान्वयनमा प्रादेशिक मन्त्रालयहरूको भूमिका अझ सशक्त बनाउन यस्तो परामर्श गोष्ठी महत्वपूर्ण रहेको बताउनुभयो। साथै, गोष्ठीबाट प्राप्त सुझावहरू मन्त्रालयको नीति निर्माण प्रक्रियामा उपयोगी हुने विश्वास व्यक्त गर्नुभयो।

गोष्ठी संयुक्त राष्ट्र जनसंख्या कोष (UNFPA) को आयोजनामा र मधेश प्रदेशको खेलकुद तथा समाज कल्याण मन्त्रालयको संयोजनमा सम्पन्न भएको हो। कार्यक्रममा विभिन्न स्थानीय तहका प्रतिनिधिहरू, महिला अधिकारकर्मी, सरकारी निकायका पदाधिकारीहरू, समाजसेवी तथा सञ्चारकर्मीहरूको उल्लेखनीय उपस्थिति रहेको थियो।

कार्यक्रममा सिडो सिफारिसका मुख्य विषयवस्तुहरू — शिक्षा, स्वास्थ्य, रोजगारी, राजनीतिक सहभागिता, लैंगिक हिंसा, तथा महिला सशक्तिकरणका विविध आयामहरूबारे विस्तृत छलफल गरिएको थियो। सहभागीहरूले सिफारिसहरू कार्यान्वयन गर्दा देखा पर्ने चुनौतिहरू र तिनको समाधान उपायहरूबारे समेत आफ्ना अनुभव र सुझावहरू प्रस्तुत गरेका थिए।

यस कार्यक्रमले सिडो सिफारिसको स्थानीय तहसम्म कार्यान्वयनलाई सशक्त बनाउने दिशामा सार्थक कदम हुने विश्वास लिइएको छ।