मधेश प्रदेशको मिडिया काउन्सिल र आमसञ्चार प्राधिकरणका अध्यक्षद्वयले लिए शपथ

बैशाख ८ गते। मधेश प्रदेश अन्तर्गत सञ्चार क्षेत्रको नियमन, अनुगमन तथा विकासमा संलग्न दुई प्रमुख निकाय—मिडिया काउन्सिल र आमसञ्चार प्राधिकरण—का नयाँ अध्यक्षहरूले सोमबार पद तथा गोपनीयताको शपथ ग्रहण गरेका छन्। आइतबार बसेको प्रदेश मन्त्रिपरिषद्को बैठकले मिडिया काउन्सिलको अध्यक्षमा पत्रकार कमल उपाध्याय र आमसञ्चार प्राधिकरणको अध्यक्षमा पत्रकार जीतेंद्र खड्गलाई नियुक्त गर्ने निर्णय गरेको थियो।

जनकपुरधामस्थित मुख्यमन्त्री तथा मन्त्रिपरिषद्को कार्यालयमा आयोजित विशेष समारोहमा प्रदेशका गृहमन्त्री राजकुमार लेखीले दुवै अध्यक्षलाई शपथ गराएका हुन्। बाराका उपाध्याय र सप्तरीका खड्ग दुवै सञ्चार तथा पत्रकारिता क्षेत्रमा लामो समयदेखि सक्रिय रहँदै आएका अनुभवी व्यक्तित्व हुन्। स्थानीय सन्दर्भप्रति गहिरो बुझाइ, अनुभव र दक्षतालाई मूल्यांकन गर्दै प्रदेश सरकारले उनीहरूलाई जिम्मेवारी सुम्पिएको हो।

शपथ समारोहमा प्रदेशका मुख्यमन्त्री सतीश कुमार सिंहले दुवै अध्यक्षलाई बधाई तथा शुभकामना दिँदै सञ्चार क्षेत्रको स्वायत्तता, उत्तरदायित्व र मर्यादा कायम राख्न आग्रह गरे। “सञ्चार माध्यम राज्य र जनताबीचको सेतु हो। त्यसैले निष्पक्षता, नैतिकता र पारदर्शिताको आधारमा सञ्चार क्षेत्रको सुदृढीकरण अपरिहार्य छ,” उनले भने।

मुख्यमन्त्री सिंहले सञ्चार क्षेत्रमा देखा परेका विकृति, पूर्वाग्रह र अव्यवस्थाको अन्त्य गरी सकारात्मक र जिम्मेवार पत्रकारिता प्रवर्द्धन गर्न आग्रह गरे। साथै, विगतका राम्रो अभ्यासलाई निरन्तरता दिँदै सुधारात्मक पहलको आवश्यकता औंल्याए।

गृहमन्त्री लेखीले मिडिया काउन्सिल र आमसञ्चार प्राधिकरणले सञ्चार क्षेत्रको संस्थागत विकास, मापदण्ड निर्माण, सञ्चार माध्यमहरूको दर्ता, निगरानी तथा व्यावसायिक आचारसंहिताको पालनामा महत्वपूर्ण भूमिका खेल्ने विश्वास व्यक्त गरे।

नवनियुक्त अध्यक्ष उपाध्याय र खड्गले आफूलाई सुम्पिएको जिम्मेवारीप्रति आभार व्यक्त गर्दै सञ्चार क्षेत्रको गरिमा संरक्षण, पत्रकारहरूको हक–हित सुनिश्चित गर्ने तथा प्रदेशस्तरीय सञ्चार संरचना सुदृढीकरणलाई प्राथमिकता दिने प्रतिबद्धता जनाए।