गिरिजानन्द साह/ जनकपुरधाम/चैत्र २७ गते। विश्व शान्ति तथा मानव कल्याणको लागि “नवकार महामंत्र दिवस” को शुभ अवसरमा मारवाड़ी सेवा समिति, जनकपुरधामद्वारा एक भव्य नवकार महामंत्र प्रार्थना सभा सम्पन्न गरिएको छ।
यो विशेष धार्मिक कार्यक्रम २०८१ साल चैत्र २७ गते बुधवार (९ अप्रिल २०२५) को दिन, नेपाली समय अनुसार बिहान ८:१६ बजे देखि बिहान ९:५१ बजे सम्म समिति सभाकक्षमा आयोजना गरिएको थियो।
कार्यक्रमको मुख्य उद्देश्य विश्वभरि शान्ति स्थापना, मानव कल्याण र आध्यात्मिक चेतनाको प्रसार गर्नु रहेको थियो। नवकार महामंत्र जैन धर्मको एक अत्यन्त पवित्र तथा शक्तिशाली मन्त्र हो, जुनले आत्मिक शुद्धि, मानसिक शान्ति र सद्भावनाको सन्देश दिन्छ।
प्रार्थना सभामा मधेस प्रदेशको मुख्यमन्त्री सतिश कुमार सिंह,मारवाड़ी सेवा समिति, जनकपुरधामका अध्यक्ष निर्मल चौधरी सहित सम्पुर्ण पदाधिकारीहरु, उद्योग बाणिज्य संघ मधेश प्रदेशको संस्थापक अध्यक्ष शिव शंकर साह हिरा,जनकपुरधाम उद्योग बाणिज्य संघको निवर्तमान अध्यक्ष जितेन्द्र महासेठ, स्थानीय समाजसेवी, समिति सदस्यहरू, धार्मिक श्रद्धालुहरू र नगरवासीहरूको उल्लेखनीय सहभागिता रहेको थियो।
कार्यक्रमको आरम्भ नवकार महामंत्रको सामूहिक जपद्वारा गरिएको थियो, जसले वातावरणलाई पूर्णतः आध्यात्मिक बनायो। प्रार्थनापछि उपस्थित जनसमुदायलाई नवकार महामंत्रको महत्व र यसको सकारात्मक प्रभावहरूबारे जानकारी दिइयो।
मारवाड़ी सेवा समितिका पदाधिकारीहरूले यस्तो धार्मिक कार्यक्रमले समुदायमा सकारात्मक ऊर्जा र एकता फैलाउने विश्वास व्यक्त गरे।
समितिले आगामी दिनहरूमा पनि यस्तै आध्यात्मिक र सामाजिक कार्यक्रमहरूलाई निरन्तरता दिने प्रतिबद्धता जनाएको छ।
Discussion about this post