गिरिजानन्द साह/जनकपुरधाम/चैत १२ गते। जनकपुरधामस्थित ऐतिहासिक तथा धार्मिक संस्थान श्री सिताराम गौशालाको नयाँ भवन निर्माण कार्यको शिलान्यास एक विशेष समारोहका बीच सम्पन्न भएको छ। उक्त भवनको शिलान्यास नेकपा (एमाले) पोलिटब्यूरो सदस्य एवं पूर्व मन्त्री माननीय जुली महतो तथा प्रदेश सभा सदस्य दीपेन्द्र ठाकुरको प्रमुख उपस्थितिमा गरिएको हो।
शिलान्यास समारोहमा जनकपुरधामका प्रतिष्ठित व्यक्तित्वहरू, सामाजिक अगुवाहरू, उद्यमी वर्गका प्रतिनिधिहरू तथा गौशालासँग प्रत्यक्ष रूपमा जोडिएका व्यक्तिहरूको उल्लेखनीय सहभागिता रहेको थियो। जनकपुरधाम उद्योग वाणिज्य संघका अध्यक्ष सुरेन्द्र भण्डारी, नगरका प्रतिष्ठित व्यक्तित्व एवं विभिन्न संघसंस्थाका पदाधिकारीहरू तथा स्थानीय अगुवाहरूले कार्यक्रममा आफ्नो उपस्थिति जनाए।
श्री सिताराम गौशाला, जनकपुरधामले विगत लामो समयदेखि धार्मिक तथा सामाजिक सेवामा अतुलनीय योगदान दिँदै आइरहेको छ। गौसंरक्षण, गाईको सेवा, धार्मिक गतिविधिहरू तथा जनकल्याणकारी कार्यहरू संचालन गर्दै आएको यस संस्थाले नयाँ भवन निर्माणमार्फत अझ प्रभावकारी सेवा प्रदान गर्ने लक्ष्य लिएको छ। कार्यक्रमलाई सम्बोधन गर्दै प्रमुख अतिथि माननीय जुली महतोले गौसंरक्षणको महत्त्वलाई उजागर गर्दै यस्तो धार्मिक तथा समाजसेवी संस्थाहरूलाई सहयोग गर्नु सबैको कर्तव्य रहेको बताउनुभयो।
त्यसैगरी, प्रदेश सभा सदस्य दीपेन्द्र ठाकुरले जनकपुरधामलाई धार्मिक पर्यटनको केन्द्र बनाउनका लागि यस्ता संस्थाहरूको विकास अपरिहार्य रहेको औंल्याउनुभयो। उहाँले गौशालाको सुदृढीकरणले धार्मिक पर्यटनलाई समेत प्रवर्द्धन गर्ने विश्वास व्यक्त गर्नुभयो।
शिलान्यास कार्यक्रमका विशेष अतिथि तथा मेयर प्रत्यासी शिवशंकर साह हिराले नगर क्षेत्रको समग्र विकासका लागि गौशालाजस्ता धार्मिक तथा सामाजिक संस्थाहरूको भूमिकालाई उच्च प्राथमिकतामा राख्नुपर्ने बताउनुभयो।
कार्यक्रममा जनकपुरधाम उद्योग वाणिज्य संघका अध्यक्ष सुरेन्द्र भण्डारीले व्यावसायिक तथा धार्मिक गतिविधिहरूको समन्वयमार्फत समाजसेवाको क्षेत्रमा ठोस कार्य गर्नुपर्ने आवश्यकता औंल्याउनुभयो।
नयाँ निर्माण हुने चार कोठे भवनले गौशालाको व्यवस्थापनलाई अझ व्यवस्थित बनाउनुका साथै गाईहरूको उचित संरक्षण र सेवाका लागि थप सुविधा प्रदान गर्ने अपेक्षा गरिएको छ।
शिलान्यास कार्यक्रमलाई सफल बनाउन श्री सिताराम गौशाला व्यवस्थापन समिति, स्थानीय समाजसेवीहरू तथा गौप्रेमी भक्तजनहरूको उल्लेखनीय योगदान रहेको थियो। कार्यक्रममा उपस्थित सम्पूर्ण महानुभावहरूले गौशालाको भविष्यका लागि सक्दो सहयोग गर्ने प्रतिवद्धता जनाए।
शिलान्यास कार्यक्रम परम्परागत वैदिक विधिअनुसार सम्पन्न गरिएको थियो, जसमा पूजाअर्चना, हवन तथा धार्मिक मन्त्रोच्चारण गरी भवन निर्माण कार्यको सफलताको कामना गरिएको थियो। यस ऐतिहासिक कार्यले जनकपुरधामको धार्मिक तथा सामाजिक क्षेत्रलाई थप सशक्त बनाउने विश्वास गरिएको छ।
Discussion about this post