गिरिजानन्द साह/जनकपुरधाम/फागुन १६ गते। जनकपुर स्पोर्ट्स क्लब र न्यू भिजन नेपालको संयुक्त आयोजनामा चौथो बिवाईडि अन्तर स्कूल क्रिकेट प्रतियोगिता यही फागुन १७ गतेदेखि जनकपुरधामको रंगभूमि मैदान (बरहबिघा) मा सुरु हुने भएको छ।
प्रतियोगितामा कुल १६ टोलीको सहभागिता रहनेछ। पहिलो तथा दोस्रो राउन्ड नकआउट प्रणालीमा खेलाइनेछ भने अन्तिम राउन्ड लिग आधारमा हुनेछ। प्रतियोगितामा उत्कृष्ट प्रदर्शन गर्ने खेलाडीहरूलाई विभिन्न विधामा पुरस्कृत गरिनेछ। उत्कृष्ट ब्याट्सम्यान, बलर, विकेटकिपर, फिल्डर तथा म्यान अफ द म्याचलाई विशेष पुरस्कार प्रदान गरिनेछ। यसबारे जानकारी आयोजक समितिका सदस्य प्रशान्त अरविन्दले आज आयोजित पत्रकार सम्मेलन मार्फत जानकारी दिएको छ।
पत्रकार सम्मेलनमा आयोजकले जनकपुर पब्लिक स्कूल, ऐरे इंटरनेशल स्कूल, मोनास्टिक स्कूल, अन्नपूर्णा स्कूल, शिशु प्रज्ञा सदन, सिद्दार्थ शिशु सदन, मदर टेरेसा पब्लिक स्कूल, न्यू भिजन स्कूल, हिमाली बोर्डिंग स्कूल, राष्ट्रिय मावि रुपैठा, संकट मोचन दे रा मा बी, किड्डी कॉनभेंट स्कूल, राजर्षि जनक इंग्लिश बोर्डिंग स्कूल, मिथिला इंस्टिट्यूट ऑफ टेक्नोलॉजी स्कूल, सिटी मोंटेसरी स्कूल र गोगल प्रसाद मावि स्कूल बसहियाले भाग लिएको जनाइएको छ ।
आयोजकका अनुसार यो प्रतियोगिताले विद्यार्थी क्रिकेट खेलाडीहरूलाई आफ्नो प्रतिभा देखाउने उत्कृष्ट अवसर प्रदान गर्नेछ। विजेता टिमलाई ट्रफी, मेडल र प्रमाण पत्र प्रदान गरिनेछ। प्रतियोगिता व्यवस्थापक तथा न्यू भिजन नेपालका अध्यक्ष अम्बु प्रसाद साहका अनुसार यस प्रतियोगिताले युवा खेलाडीहरूलाई प्रेरित गर्ने लक्ष्य राखिएको छ। जनकपुरधामका अभिभावकहरु पनि जागरुक भई सकेको र यहाँका बच्चामा अहिले गरिएको लगानी तुरुन्तका तुरुन्त हेरिन त पाइँदैन् तर, आगामी एक दशक पछि नेपाल टिम तथा एनपीएलको नेतृत्वनै जनकपुरधामका खेलाडीहरुले गर्ने साहले बताए । विद्यार्थीहरुलाई अतिरिक्त क्रियाकलाप अन्तर्गत आयोजक न्यू भिजन नेपाल र जनकपुर स्पोट्र्स क्लबले अन्तर स्कूल क्रिकेट प्रतियोगिता गराउँदै आएको छ ।
समारोह उद्घाटन फागुन १७ गते बिहान ११ बजे जनकपुरधामको बारहबिघा मैदानमा हुनेछ। उद्घाटन समारोहमा जनकपुरधाम उप-महानगरपालिकाका नगर प्रमुख श्री मनोज कुमार साह प्रमुख आतिथ्यका रूपमा उपस्थित रहनेछन्। आयोजकले सम्पूर्ण खेल प्रेमीहरूलाई प्रतियोगिता अवलोकन गर्न आग्रह गरेको छ।
Discussion about this post