जनकपुरधाम । लामो समयदेखि नगराईन नगरपालिकामा मेयर विनय कुमार यादव र उपमेयर राधादेवी यादवबीचको विवादका कारण नगरसभा अन्योलमा परेको छ। नगरसभाको अभावले गर्दा कर्मचारीको तलब, सामाजिक सुरक्षा भत्ता लगायतका सेवाहरु प्रभावित भएका छन्।
नगराईन नगरपालिकाका मेयर विनयकुमार यादवले उपमेयरकै कारण नगरपालिकाको कामकाज प्रभावित भएको आरोप लगाएपछि उपमेयर राधादेवी यादवले आरोपलाई पुष्टि गर्न चुनौती दिएकी छन्। असारभित्र नगरसभा सम्पन्न गर्नुपर्ने कानूनी प्रावधान भए पनि मेयर र उपमेयरबीचको विवादका कारण पाँच महिनादेखि नगरसभा हुन सकेको छैन, जसले गर्दा शिक्षक र कर्मचारीले तलब नपाएको भन्दै आन्दोलनमा उत्रिएका छन्।
उपमेयर राधादेवी यादवले सोमबार पत्रकार सम्मेलन गर्दै, नगरपालिकाका कर्मचारीहरूको तलब र विभिन्न सेवाहरु तत्काल उपलब्ध गराउनका लागि मेयरलाई आग्रह गरिसकेको बताइन्। उनले कार्यविधि संशोधनमा सहमति भए पनि मेयरले कार्यान्वयन नगरेको कारण आन्दोलनमा उत्रिनु परेको बताइन्। उपमेयर यादवका अनुसार, गत वर्षको सम्झौतामा मेयरले आफूहरुलाई झुक्याउँदै सम्झौताको कार्यान्वयन नगरेको आरोप लगाइएको छ। उनले मेयर विनयकुमार यादवलाई जिम्मेवारी लिन र कार्यविधि संशोधनमा तत्काल हस्ताक्षर गर्न आग्रह गरिन्। उपमेयर यादवले नगरको कामकाज ठप्प हुनुको जिम्मेवारी मेयरमाथि रहेको र आन्दोलन जारी रहने चेतावनी पनि दिइन्।
नगराईन नगरपालिका पूर्व उपप्रधान तथा गृहमन्त्री विमलेन्द्र निधिको गृहगाउँ हो भने सो क्षेत्रबाट एमाले नेतृसमेत रहेकी सांसद जुली कुमारी महतो छिन् । यस आन्दोलनसंग जोडेर यी दुवै नेतालाई जोडेर हेर्दा गलत अर्थ लाग्ने बताउँदै उपमेयर यादवले गलत अर्थ नलगाइदिन आग्रह समेत गरिन् । उपमेयर यादवले नगराईन नगरपालिकाको कामकाज ठप्प हुनुको कारण मेयर नै रहेको दाबी गर्दै उनले यस नगरपालिकाको कामकारबाहीलाई जोडेर नेकपा एमालेकी नेतृ जुलीकुमारी महतो र नेपाली कांग्रेसका नेता विमलेन्द्र निधिको नाम जोड्नु गलत रहेको बताइन् । उनले हामीले आफ्नो पालिका आफैले बनाउने भएपछि सांसदसमेत रहेकी नेतृ महतो र नेता निधिको नाम जोडेर आन्दोलनलाई कमजोर नगर्न आग्रह गरिन् । उनले मेयरसंग विगतमा कार्यविधि संशोधन गरी बजेट संचालनसम्बन्धी अधिकार उपमेयरमा पनि निहित रहने भनि भएको सम्झौताको आधारमा कार्यविधि संशोधन नहुँदा पाँच महिनादेखि हामी आन्दोलनमा रहेको बताइन् ।
नगराईन नगरपालिकाका कार्यकारी सदस्य रामदुलार मुखियाले भने, ‘बजेट सचालनसम्बन्धी अधिकार मेयर र उपमेयरलाई समेत रहने गरी कार्यविधिमा संशोधन गर्दै मेयर ‘वा’ उपमेयर हुनुपर्नेमा मेयर पक्षले मेयर ‘र’ उपमेयर भनि लेखेर हामीलाई झुक्याए पनि अन्तिमसमयमा आफूहरुले सो सम्झौता मान्दै कार्यान्वयनका लागि पालिकाको विधायन समितिमा पनि सो कार्यविधि संशोधन गरिए पनि मेयरले संशोधनसहितको कार्यविधिमा हस्ताक्षर नगरी आलटाल गरे पछि हामीले बाध्य भएर आन्दोलनमा उत्रिुन परेको हो ।’ उनले अन्तिम समयमा मेयर यादवले नै संशोधनका लागि रोक लगाएर हामीलाई झुक्याउँदै खेलाउन खोजेपछि बाध्यतावश आन्दोलित भएको बताए ।
त्यस्तै नगराईन –८ का वडाअध्यक्ष सञ्जय राउतले मेयरसंग भएको उपमेयरलाई आर्थिक सञ्चालनसम्बन्धी कार्यविधि संशोधन सम्बन्धी सम्झौता कार्यान्वयन नहुँदासम्म आफूहरुको आन्दोलन जारी रहने बताए । वडाअध्यक्ष राउतले नगराईन नगरपालिकालाई कुनै पनि अवस्थामा भ्रष्टाचारको अखाडा बन्न नदिने दाबी गरे । उनले मेयर यादवले निमित्त प्रशासकीय अधिकृतसंगको मिलेमतोमा अपारदर्शी ढंगले पालिकाको विकास निर्माणलगायतका बजेटमा अनियमितता गरेको आरोप लगाउँदै पारदर्शी गर्न माग समेत गरे । विकास निर्माणलगायतका बजेटमा मेयरले केही कर्मचारीको मिलेमतोमा व्यापक भ्रष्टाचार गरेको दाबी गर्दै ससर्त अनुदान बाहेक विकास निर्माणका कामकाज समस्या सामाधान नहुञ्जेलसम्म बन्द रहने बताए ।
नगराईन नगरपालिकाको १९ सदस्यीय कार्यपालिकामा १३ जना एमालेका जनप्रतिनिधि छन् भने कांग्रेसको ५ र लोसपा नेपालका १ जना जनप्रतिनिधि छन् । मेयर यादव कांग्रेसबाट निर्वाचित छन् भने एमालेबाट उपमेयरमा राधादेवी यादव निर्वाचित छिन् । विगतमा पनि एमालेबाट निर्वाचित जनप्रतिनिधिहरुले ९ महिनासम्म आन्दोलन गरेपछि कर्मचारी र शिक्षक तलबभत्तालगायतका सेवा सुविधाका लागि, ज्येष्ठ नागरिकलगायतकाले सामाजिक सुरक्षा भत्ता तथा सेवा सुविधाका लागि र विद्यार्थीले अध्ययनका लागि आन्दोलन गर्नुपरेको थियो ।
Discussion about this post