आज सीता जयन्ती , जनकपुरधाममा ९ दिवसीय जानकी जन्म महोत्सव धुमधामका साथ मनाइदै

जेठ ३ गते। आज वैशाख शुक्ल नवमी अर्थात् सीता जयन्ती पर्व मनाइँदै छ । देशभरका रामजानकी मन्दिरमा विशेष पूजा आराधना गरी यो दिवस मनाइँदै छ ।

त्रेतायुगमा मिथिलाका राजा जनकले यज्ञ अनुष्ठानका क्रममा खेत जोत्दा सीताको उत्पत्ति भएको वर्णन वाल्मीकि रामायण र पुराणहरूमा वर्णन गरिएको छ । प्राचीनकालदेखि नै सीता उत्पत्ति भएको दिनलाई सीता जयन्तीका रूपमा मनाउने गरिएको छ ।

भगवान् विष्णुको छैटौँ अवतारका रूपमा अयोध्याका राजा दशरथका पुत्रका रुपमा श्रीरामको जन्म हुने भएपछि लक्ष्मी सीताका रूपमा उत्पत्ति हुनुभएको वर्णन विभिन्न धार्मिक ग्रन्थमा उल्लेख छ । सीतालाई सत्यवती, पतिव्रता एवं आदर्श नारीका रुपमा पनि सम्मान गरिन्छ ।

आदर्श नारी सीताको जन्मदिनको अवसर पारेर जनकपुरधाममा ९ दिवसीय जानकी जन्म महोत्सव धुमधामका साथ मनाइदैछ । सीताको मिथिलामा जन्म भएको धार्मिक मान्यताअनुसार प्रत्येक वर्ष जानकी नवमी धूमधामका साथ मनाउने परम्परा रहेको छ । मिथिलाका राजा शिरध्वज जनकको छोरीको रुपमा जगत जननी जानकीको प्रादुर्भाव भएको धार्मिक ग्रन्थहरु उल्लेख छ । वैशाख शुक्लपक्ष नवमी तिथिका उनको प्रादुर्भाव भएको मान्यता अनुसार जानकी जन्म महोत्सव मनाइन्छ।

सीता जयन्तीका अवसरमा जनकपुरको रामजानकी मन्दिरमा मेला लागेको छ । जनकपुरधामसहित सम्पूर्ण मिथिलाञ्चलमा जगतजननी माता जानकीको जन्मोत्सव धुमधामका साथ मनाइँदै गरेको जनकपुरबाट हाम्रा स्थानीय प्रतिनिधिले जनाएका छन् । जानकी नवमीका अवसरमा जानकी मन्दिरलाई दुलहीझैँ सिँगारिएको छ । सीताको जन्मोत्सवमा सहभागी हुन तथा पूजापाठ गर्न नेपाल तथा भारतका विभिन्न स्थानबाट श्रद्धालु भक्तजन तथा पर्यटकहरु जनकपुरधाम आउने गर्छन् । यद्यपि नेपालको राष्ट्रिय विभूती सीताको जन्म दिवसमा राष्ट्रिय विदा नहुँदा जानकी मन्दिरका उत्तराधिकारी महन्थ रामरोशन दास वैष्णव दुःख व्यक्त गर्छन । उनले राष्ट्रिय पर्वको रुपमा जानकी नवमीको अवसरमा राष्ट्रिय विदा दिन नेपाल सरकारसंग माग समेत गरेका छन् ।
जानकी मन्दिरले नौ दिवसीय जानकी नवमीको अवसर पारेर विभिन्न कार्यक्रमको आयोजना गरेको छ भने जानकी नवमीका दिन दूधमती नदीमा शाही स्नानका साथै भव्य पूजाको तयारी समेत गरेको छ ।