बैशाख ९ गते। भारतमा एक किसानले गहुँको खुटीमा आगो सल्काउँदा आगोको झिल्का नेपालको पर्सा सम्म आइपुग्दा यहाँका पाँच घर जलेर नष्ट भएको छ।
भारतको बिहारमैनाटाड नजिकै रहेको वसन्तपुर सेख टोल बस्ने ती भारतीय महिलाले सल्काएकाे आगाेकाे झिल्का उछिट्टिएर हावाले सीमावर्ती क्षेत्र पर्साको छिपहरमाई गाउँपालिका-१ भलुवहीयाँ स्थित बस्तीसम्म ल्याइपुर्याउँदा यहाँकाे बस्तीमा नै क्षति पुगेकाे हाे।
ईलाका प्रहरी कार्यालय पोखरियाका प्रहरी निरीक्षक मोहनविक्रम केसीका अनुसार, भलुवहीयाँ गाउँसँग जोडिएको सीमावर्ती भारतीय गाउँ बसन्तपुरको खेतमा गहुँ काटेर बाँकी रहेको खुटी (ठुटा) जलाउन एक किसानले आगो लगाएको र त्यही बेला चलेको हावाहुरीले आगोको लप्का भलुवहीयाँ गाउँको गहुँखेतमा सल्किएर त्यसैबाट आगलागी भएको हो।
आगलागीबाट भलुवहीयाँ गाउँका किसुनदेव पासवान,मुकेश पासवान,रूपा पासवान, सन्तोष पासवान र लखन पासवानको घर तथा मनमोद प्रसाद यादवको कुखुरा फार्म जलेर नष्ट भएको हो। आगलागीबाट घर र त्यसमा रहेका सबै सामानहरु पूर्णरुपमा जलेर नष्ट भएका कारण ती घरका परिवारहरु बिचल्लीमा परेका स्थानीय शैलेश गुप्ताले जानकारी दिए। भलुवहीयाँ गाउँमा लागेको आगलागी वीरगन्ज महानगरपालिका र पोखरीया नगरपालिकाबाट गएका दुई वटा दमकलको मदतमा स्थानीयवासी, नेपाल प्रहरी र सशस्त्र प्रहरीले मिलेर निभाएको उनले बताए।
Discussion about this post