जनकपुरधाम/कार्तिक ७ गते। जनकपुरधामस्थित प्रसिद्ध जानकी मन्दिर परिसरमा लामो समयदेखि जीर्ण अवस्थामा रहेको वाटर फाउन्टेन हटाएर उक्त स्थानमा नेपालको राष्ट्रिय झण्डा राखिएको छ। पत्रकार सञ्जय यादवको अगुवाइमा फाउन्टेन हटाउने कार्य गरिएको हो।
वर्षौंदेखि बिग्रिएर प्रयोगविहीन अवस्थामा रहेको फाउन्टेनले मन्दिर परिसरको सौन्दर्यमा असर पारिरहेको भन्दै त्यसलाई हटाएर स्थानलाई नयाँ स्वरूप दिने प्रयास गरिएको बताइएको छ। फाउन्टेन हटाएपछि त्यहाँ राष्ट्रिय झण्डा राखिएको छ, जसले मन्दिर परिसरमा राष्ट्रिय पहिचान झल्काउने अपेक्षा गरिएको छ।
राष्ट्रिय स्वतन्त्र पार्टी (रास्वपा) का र्यापिड एक्सन टिम विभाग प्रमुख अम्भु प्रसाद साहले लामो समयदेखि जीर्ण अवस्थामा रहेको फाउन्टेन हटाएर त्यस स्थानमा राष्ट्रिय झण्डा राखिएको जानकारी दिएका छन्। उनका अनुसार यस कार्यको उद्देश्य जानकी मन्दिर परिसरलाई थप आकर्षक बनाउनुका साथै राष्ट्रिय पहिचानलाई सम्मान गर्नु हो।
धार्मिक, सांस्कृतिक तथा पर्यटकीय महत्त्व बोकेको जानकी मन्दिरमा दैनिक ठूलो सङ्ख्यामा स्वदेशी तथा विदेशी पर्यटक र श्रद्धालुहरू आउने गर्छन्। मिथिलाको धार्मिक आस्था र ऐतिहासिक पहिचानसँग जोडिएको यस मन्दिर परिसरको सरसफाइ, संरक्षण तथा सौन्दर्यीकरणलाई विशेष महत्त्वका साथ अघि बढाउनुपर्ने आवश्यकता देखिन्छ।
मन्दिर परिसरमा रहेका जीर्ण संरचनाको उचित व्यवस्थापन, नियमित सरसफाइ र आवश्यक पूर्वाधारको संरक्षणले धार्मिक पर्यटन प्रवर्द्धनमा समेत सहयोग पुग्ने अपेक्षा गरिएको छ। राष्ट्रिय झण्डा राखिएसँगै उक्त स्थानको स्वरूपमा परिवर्तन आएको छ।
जानकी मन्दिर परिसरलाई स्वच्छ, व्यवस्थित र आकर्षक बनाउने यस्ता प्रयासलाई निरन्तरता दिनुपर्ने स्थानीयको अपेक्षा छ।
Discussion about this post