काठमाडाैं/कार्तिक ७ गते। आज विश्व विकास सूचना दिवस । प्रत्येक वर्ष अक्टोबर २४ का दिन मनाइने विश्व विकास सूचना दिवसको मुख्य उद्देश्य विकाससम्बन्धी समस्याहरूप्रति विश्व समुदायको ध्यानाकर्षण गराउनु र तिनीहरूको समाधानका लागि अन्तर्राष्ट्रिय सहयोगलाई सुदृढ पार्नु हो।
यो दिवसले विशेष गरी आर्थिक विकासका समस्याहरू र तिनलाई हल गर्न जनसरोकार तथा सूचनाको पहुँच कसरी बढाउन सकिन्छ भन्ने विषयमा चेतना जगाउँछ।
संयुक्त राष्ट्रसंघीय महासभाले सन् १९७२ मा यो दिवस मनाउने निर्णय गरेको हो। संयुक्त राष्ट्रसंघले १९७० मा पारित गरेको दोस्रो संयुक्त राष्ट्रसंघीय विकास दशकको अन्तर्राष्ट्रिय विकास रणनीतिकै दिन (अक्टोबर २४, १९७०) सँग यसलाई जोडिएको छ। यसै दिन संयुक्त राष्ट्रसंघको स्थापना दिवस पनि पर्ने भएकाले यसको महत्व अझ बढेको छ।
विकासका लक्ष्यहरू हासिल गर्न, जनचेतना फैलाउन र नीति निर्माणमा जनताको सहभागिता सुनिश्चित गर्न सही समयमा सही सूचना उपलब्ध हुनुपर्छ भन्ने सन्देश यो दिवसले दिन्छ।
विकसित र विकासोन्मुख राष्ट्रहरूबीचको आर्थिक तथा सामाजिक विकासको खाडललाई कम गर्न र प्रविधिको न्यायसम्मत पहुँच पुर्याउन आपसी सहयोग अपरिहार्य रहेको कुरामा जोड दिइन्छ।
विकासका हरेक गतिविधिमा सूचनाको स्वतन्त्र प्रवाह र पारदर्शिताले मात्र नागरिकलाई सशक्त बनाउन सक्छ भन्ने मान्यता यसको मूल मर्म हो।
यस दिवसले हामीलाई सूचना र प्रविधिको सही सदुपयोग गर्दै दिगो विकासका लक्ष्यहरू प्राप्त गर्न सबैको संयुक्त प्रयास आवश्यक रहेको कुरा स्मरण गराउँछ।
Discussion about this post