सप्तरी/श्रावण २१ गते। हुलाकी राजमार्गको सडक अतिक्रमण गरी बनाइएका संरचनाहरू राजविराज नगरपालिकाले हटाउन सुरु गरेको छ । राजविराज वडा नम्बर ६ र ७ मा पर्ने सिरहा रोडमा हुलाकी राजमार्गको सडकलाई अतिक्रमण गरी बनाइएका निजी घर लगायतका संरचनाहरु आइतबार बिहानदेखि डोजर लगाएर नगरपालिकाले हटाउन सुरू गरेको हो ।
अतिक्रमित संरचना नहटाइँदा उक्त खण्डमा हुलाकी मार्ग निर्माण हुन सकिरहेको थिएन । अतिक्रमण गरी बनाइएका संरचना हटाउन सूचना गरिए पनि नहटाइएपछि डोजर लगाएर भत्काउनु परेको राजविराज नगरपालिकाकी कार्यवाहक नगर प्रमुख इसरत परविणले जानकारी दिइन् ।
बिहानैदेखि नेपाल र सशस्त्र प्रहरीको सुरक्षामा कार्यवाहक नगर प्रमुख परविणको नेतृत्वमा जनप्रतिनिधिहरु , नगरपालिकाका कर्मचारीहरु र सफाइकर्मीहरु अतिक्रमण हटाउने कार्यमा जुटेका छन् । यसअघि नगरपालिकाले राजविराजको हटियामा रहेको अतिक्रमण पनि डोजर लगाएर हटाएको थियो । कान्तिपुर बाट
Discussion about this post