धनुषा/जेष्ठ ३ गते। जनकपुरधाम उपमहानगरपालिका–४ को वडाध्यक्षमा नेपाली कांग्रेसका सुरेश झा पण्डित प्यानल सहित विजयी भएका छन् ।
पण्डित आफ्ना निकटतम् प्रतिद्वन्द्वी लोकतान्त्रिक समाजवादी पार्टी नेपालका सुदर्शन सिंहलाई ६ मतले पराजित गर्दै विजयी भएका हुन् । सोमबार जारी मत परिणाम अनुसार झाले ८ सय ३३ मत प्राप्त गरेका छन् भने सिंहले ८ सय २७ मत प्राप्त गरेका छन् ।
त्यसै गरी वडा अध्यक्षमै स्वतन्त्रबाट उम्मेदवारी दिएका राकेश कुमार सिंहले ३ सय ४१ मत ल्याइ तेस्रो स्थान प्राप्त गरेका छन् । मुख्य निर्वाचन अधिकृतको कार्यालयले दिएको जानकारी अनुसार सोमबार साँझ जारी मतगणना अनुसार झा प्यानल सहित विजयी भएका हुन् ।
यसअघि वडा नम्बर–१ को वडाध्यक्षमा नेपाली कांग्रेसका दीपनारायण यादव १ हजार १ सय ४३ मतसहित निर्वाचित भइसकेका छन् भने वडा नम्बर– २ को वडाध्यक्षमा पनि नेपाली कांग्रेसकै शिवकुमार साह ६ सय ११ मत सहित निर्वाचित भइसकेका छन् ।
नकपुरधाम उपमहानगरपालिकाको चार वटा वडाको सम्पन्न मत परिणाम अनुसार तीन वटा वडामा नेपाली कांग्रेसले जितेको छ भने वार्ड नम्बर ३मा तराई मधेश लोकतान्त्रिक पार्टीका दिपेन्द्र साह विजयी भएका छन् ।
Discussion about this post