महोत्तरी : एसएसबीको चेतावनीपछि दशगजा क्षेत्रका पसलहरु खाली गरिंदै

महोत्तरी/पुस १३ गते । नेपाल र भारतबीचको सीमामा रहेको दशगजा क्षेत्रको अतिक्रमण गरी सञ्चालनमा रहेको पसलहरु खाली गर्ने क्रम जारी रहेको छ ।

सशस्त्र सीमा सुरक्षा बल (एसएसवी)ले खाली नगरे डोजर चलाएर खाली गराउने चेतावनी दिएपछि अतिक्रमणकारीहरुले पसल,घरटहरा खाली गर्न थालेका छन् ।

दशगजा क्षेत्रमा अतिक्रमण गरी बसोबास गरिरहेकालाई शनिबार सचेत गराई आइतबारदेखि वस्ती खाली गर्न निर्देशन समेत दिइएको थियो ।

भारत बिहारको सीतामढी जिल्लाको सुरसण्ड थानासंग जोडिएको महोत्तरी जिल्लाको मनरासिस्वा–९ बथनाहा, १० मधवा, ११ मरुवाही लगायतको क्षेत्रमा अनाधिकृत रुपमा निर्माण गरिएको घर टहरा तथा सञ्चालित पसललेहरुले एसएसबीले डोजर लगाइ दिने डरका कारण आफै खाली गर्न थालेको बथनाहाका आदित्य झाले बताए । सो क्रममा बथनाहाको महतोटोलदेखि स्कुल चोक सम्म त्यो क्षेत्रमा बनाइएको गोठ तथा चौपायालाई शनिबार नै खाली गराइएको थियो भने झुपडीहरु आइतबार सम्म खाली नगरे डोजर लगाएर भत्काउने चेतावनी दिइएको थियो ।

दशगजा अतिक्रमण गरेर बनाइएको बथनाहा बजारमा भारततर्फका पसलेहरुले पसल खाली गरेका छन् भने नेपालतर्फ अझै पनि पसल सञ्चालनमै रहेको देखिएको छ ।

भारततर्फका मासु ,सैलुन तथा पान पसलहरुलाई पसलेहरुले आफैले खाली गरेका छन् । एसएसबीको गस्ती टोलीले शनिबार जारी गरेको चेतावनीपछि घर टहरा भत्काउने काम अतिक्रमणकारीहरुले नै गर्न थालेपछि डोजर लगाउने काम भने अहिलेलाई स्थगित गरेको हुन सक्ने स्थानीयवासीहरुको धारणा छ ।

सञ्चालनमा रहेका पसलहरु आफैले खाली गर्न थालेपछि एसएसबीले केही समय अझै दिएको दशगजा क्षेत्रमा पान पसल सञ्चालन गर्दै आएका रासलाल महतोले बताए । सीमावर्ती भारतसँग जोडिएको कटैया, बथनाहा, मधवा, मरुवाही, नैनही, भिठ्ठामोड, मटिहानी सम्मको करिब १५ किलोमिटरसम्मको दशगजा क्षेत्र अतिक्रमणको चपेटामा परेको अनुमान गरिएको छ ।

दशगजा अतिक्रमण गरी कतिपयले खेतीपाती समेत गरिरहेका छन् भने नेपालतर्फका नागरिकले दशगजामै पराल थुपार्ने, गुइठा बनाउने, पशु चौपाया बाध्ने जस्ता कार्य गरेकाकारण दुई देशलाई छुट्याउने दशगजा (नोमेन्स ल्याण्ड) अतिक्रमणको चपेटामा परेको देखिएको छ । भारतीय नागरिकहरुले घर टहरा नै निर्माण गरी वसोवास गर्दै आएका छन् ।

अन्तर्राष्ट्रिय मापदण्डअनुसार दशगजा क्षेत्र एक सय मिटर दायां र बायां कुनै पनि कार्य गर्न निषेधित भए पनि सम्बन्धित निकायको उदासीनताको कारण ठाउं ठाउंमा बजार नै लाग्ने गरेको छ भने कतिपय स्थानमा पक्की घर नै निर्माण गरी दशगजा नै नदेखिने गरी अतिक्रमित भएको अवस्था छ ।

सीमा क्षेत्रमा नेपाल प्रहरी र सशस्त्र प्रहरीका विओपीहरू भए पनि अवाञ्छित गतिविधिमाथि निगरानी राख्ने, अवैध मालसामानको ओसारपसार नियन्त्रण गर्ने तथा दुबै देशको अपराधिक कार्य गरेर सजिलै सीमा वारिपारी गर्नेहरूमाथि अंकुश लगाउने गरेको तर, दुवै देशका स्थानीय बासिन्दाद्वारा भइरहेको अतिक्रमणलाई नियन्त्रण गर्न ठोस कदम नचालिँदा उनीहरूको मनोबल बढदै गएकोले अतिक्रमण हटाउन अभियान नै थालनी गरिएको छ ।