अजय कुमार झा/जनकपुरधाम/मंसिर १ गते । प्राचीन मिथिलाको राजधानी जनकपुरधाममा विद्यापति स्मृति दिवस यस पटक कुनै औपचारिक कार्यक्रम नभएपछि यसको विभिन्न क्षेत्रबाट आलोचना भएको छ ।
जनकपुरधामको विद्यापति चोकमा रहेको विद्यापति स्मारक संरक्षण समितिले विद्यापति स्मृति समारोह आयोजना गर्दै आएकोमा यस पटक समितिका अध्यक्ष समेत रहनु भएका चन्द्रमोहन चौधरीलाई पत्नी शोक भएका कारणले मनाउन नसकेपछि कुनै संस्थाले स्मृति दिवस मनाएको छैन ।
विद्यापतिको नाउँमा नेपाल विद्यापति पुरस्कार कोष बृहत्तर जनकपुर क्षेत्र विकास परिषद् अन्तर्गत भए पनि सो संस्थाले पनि स्मृति दिवस मनाएको छैन । यसका साथै जनकपुरधाम उपमहानगरपालिकाले पनि कुनै कार्यक्रमको आयोजना गरेका छैन ।
अधिकारको नाउँमा स्थापना भएको प्रदेश सरकारले पनि विद्यापति स्मृति दिवस नमनाएकोमा सञ्चारकर्मी जयन्त ठाकुरले आक्रोश व्यक्त गर्नु भएको छ । मिथिला र मैथिलीको नाउँमा संस्था खोल्नेहरू पनि स्मृति दिवस नमनाउनु दुःखद भएको ठाकुरले बताउनुभयो ।
विद्यापति स्मारक संरक्षण समितिका अध्यक्ष रहनु भएका चन्द्रमोहन चौधरीले आफू पारिवारिक समस्यामा भएको कारणले यस पटक मनाउन नसकेपछि जनकपुरधाम उपमहानगरपालिका, विद्यापति पुरस्कार कोष र प्रदेश सरकारले नियमित रुपमा संस्थागत तरिकाले मनाउनु पर्नेमा नमनाउनु दुःखद भएको बताउनुभयो ।
यसका साथै मिथिला तथा मैथिलीको नाममा सत्ता र भत्ता पाउनेहरू पनि कवि कोकिश विद्यापति स्मरणमा नगर्नु दुःखद भएको बताउनु भयो । यता मिथिला नाट्य कला परिषदका अध्यक्ष परमेश झाले आफूहरूले कुनै पनि वर्ष स्मृति दिवस नमनाएको बताउनुभयो ।
मैथिली साहित्यका महाकवि विद्यापतिद्वारा रचित अनेकन रचनाहरू अहिले पनि मिथिलाको घर घरमा नै प्रयोग भइरहेको छ । हरेक संस्कारहरूमा विद्यापतिको रचनाको प्रयोग हुने गरेको छ । विद्यापतिले रचना गर्नु भएको रचनाहरू कालजयी रहेको छ ।
जनकपुरधाममा नै त्रिभुवन विश्वविद्यालयको मैथिली केन्द्रीय विभाग रहेको छ । नेपाल संस्कृत विश्वविद्यालयको क्याम्पसमा पनि मैथिली विभाग रहेको छ । यसमा धेरै प्राध्यापक उपप्राध्यापकहरूले मासिक रुपमा मैथिली र मिथिलाको नाउँमा ६० हजार देखि ८० हजार बुझ्ने गरेको भए पनि स्मृति दिवस नमनाउनु दुःखद भएको स्थानीय बुद्धिजीवीहरूले बताउनु भएको छ । विगतका वर्षहरूमा स्मारकको रङ्ग रोगनका साथै सजाउने काम वर्षै पिच्छे हुने गरेको थियो ।
Discussion about this post