महोत्तरीमा डकैती गराउने मुख्य योजनाकार पक्राउ

जनकपुरधाम/कार्तिक ११ गते। महोत्तरीको सम्सी गाउँपालिकामा चार महिना अघि एक परिवारमाथि आक्रमण गर्दै लुटपाट गरेको आरोपमा प्रहरीले एकजनालाई पक्राउ गरेको छ ।

सम्सी गाँउपालिका १ पर्सा देवाडमा भएको डकैती घटनामा संलग्न रहेको घटनाका मुख्य योजनाकार सर्लाहीको लालबन्दी नगरपालिका-२ पुर्नवास निवासी कारी भनिने विश्वनाथ पासवानलाई पक्राउ गरेको हो। उनलाई महोत्तरीको सोनमा गाउँपालिका ३ रघुनाथपुरमा घुमफिर गरिरहेको अवस्थामा पक्राउ गरेको हो ।

सोनामा गाँउपालिका ३ बाट पक्राउ गरेका पासवानलाई बिहीबार जिल्ला प्रहरी कार्यालय महोत्तरीले जलेश्वरमा पत्रकार सम्मेलन गरी सार्वजानिक गरेको हो। प्रहरीका अनुसार पासवान लगायतका हतियारधारी समुहले गत असार ३ गते राती स्थानीय विरेन्द्र साहले आफ्नै घरमा सञ्चालन गरेको राजिव ज्वेलर्समा डकैती गरेको थियो। 

पासवानसहितको समूहले साहको घरभित्र प्रवेश गरी साहकी पत्नी सुशिला देवी, छोराहरू शम्भु साह, राजीव साह र छोरी कञ्चन कुमारीलाई रडले प्रहार गरी घाइते बनाएका थिए ।

सोही समूहले कटुवा पेस्तोलले वीरेन्द्रको ढाडमा गोली प्रहार गरी घाईते बनाउँदै रु ८ लाख ९७ हजार २ सय बराबरको नगद तथा सुनचाँदीका गरगहना लुटेर लगेको प्रहरीको दाबी छ ।

प्रहरीका अनुसार उक्त घटनामा संलग्न ब्यक्तिहरू मध्येका मुख्य योजनाकार पासवान नै रहेको छ । पक्राउ परेका उनीमाथि थप अनुसन्धान भइरहेको महोत्तरी प्रहरीका प्रबक्ता एवं डीएसपी प्रकाश बिष्टले जानकारी दिए ।

डीएसपी बिष्टका अनुसार पासवान अन्य बिभिन्न अपराधिक घट्नामा संलग्न भएको पाइएको महोत्तरी प्रहरीले जनाएको छ । २०६६ बैशाख ७ गते पासवानसहितकाले सर्लाहीका राम किशोर महतोको साथमा रहेको नगद रू ७ लाख ५० हजार हतियार देखाउदै लुटेका थिए । यो मुद्दामा उनीबिरुद्ध सर्लाहीबाट डाँका तथा हातहतियार सम्बन्धी मुद्दा चलेको छ ।

२०६४ भदौ १९ गते लालबन्दीबाट नयारोड हरीवन तर्फ गई रहेको ना २ ख ८७८५ नम्बरको ट्रकलाई दलित जनजाति पार्टीका कार्यकर्ता दिलिप पासवान समेतका १४ जना अगाडिको सिसा फुटाई क्याबिनमा बम प्रहार गरी आगो लगाई क्षति पुर्याएको सम्बन्धी घट्नामा ईलाका प्रहरी कार्यालय, हरीपुर, सर्लाहीबाट पासवान समेत उपर बम बिष्फोटक शीर्षकमा मुद्दा चलेको देखिएको छ ।

यस्तै, पासवान सिरहाको मिर्चेयामा २०७३ साल असार १ गते भएको रु २ लाख १७ हजार बराबरको गहना लुटपाट, सर्लाही, धनगडीमाई–४ बस्ने प्रदिप कुमार साहको घर/कोठामा प्रवेश गरी कुटपिट गर्दै अपहरण गर्न खोजेको घट्नामा तथा रुपन्देहीमा गरगहना लुटपाट गरेको घट्नामा उनीबिरुद्ध मुद्दा रहेको प्रहरीले जनाएको छ ।