सनराइज बैंकद्वारा फुकुवापत्र पाइसकेर पनि जरिवाना लिएको खुलासा, सोधपुछ गर्दा ग्राहकमाथि दुर्व वहार

उमेश कुमार साह/सप्तरी/कार्तिक ७ गते।ऋणीले आफ्नो सम्पूर्ण कर्जा चुक्ता गरि बैंकद्वारा फुकुवापत्र पाइसकेर पनि तीन महिनापछि बैंकले बिना जानकारी सो ऋण वापतको ब्याज र जरिवाना लिएको तथ्यको खुलासा भएको छ ।

सप्तरीको बोदेबरसाइन नगरपालिका ५ स्थित मनि किराना पसलका संचालक कृष्णदेव भगतले आइतबार राजविराजमा पत्रकार सम्मेलनको आयोजना गरि बैंकको सबै ऋण चुक्ता गरिसकेपछि पनि पुन: ब्याज र जरिवाना लिएको जानकारी दिएपछि सो तथ्यको खुलासा भएको हो ।

पसल संचालक भगतले राजविराजस्थित सनराइज बैंक लिमिटेडमा जग्गा धितो राखी लिएको २ करोड ५० लाख ऋण झण्डै चार महिनाअघि नै चुक्ता गरि गत असार १३ गते फुकुवापत्र समेत पाइसकेको अवस्थामा बैंकले आफूलाई कुनै जानकारी नै नदिई खाताबाट ४ लाख ४७ हजार १ सय ६५ रुँपैया कट्टा गरेको बताए ।

गत असोज ३१ गते आइपिएस ट्रान्सफर विधीमार्फत सिटिजन बैंकबाट २१ लाख ९३ हजार रकम सनराइज बैंकमा रहेको मनि किराना पसलको खातामा जम्मा भएपछि कात्तिक १ गते एक कारोबारीलाई २१ लाख ९२ हजार ५ सयको चेक काटेर दिएको तथा सो चेक वाउन्स भएपछि मात्र आफ्नो खाताबाट रकम कट्टा भएको थाहा पाएको उनको भनाई छ ।

सो सम्बन्धमा बैंकमा सम्पर्क गर्दा ऋण वापतको ब्याज ४ लाख ४१ हजार ८ सय ३६ र जरिवाना वापत ५ हजार ३ सय २९ गरि ४ लाख ४७ हजार १ सय ६५ रुँपैया काटिएकोप्रति आफू चकित भएको उनले सुनाए ।

उनले यसबारे सनराइज बैंकका शाखा प्रमुख मुकेश साहलाई कात्तिक १ गते नै फोन सम्पर्क गरि जानकारी लिदा बुझेर भन्छु भन्दै जवाफ दिएको र भोली पल्ट बिदा परेकोले कात्तिक ३ गते पुन: फोन सम्पर्क गर्दा शाखा प्रमुख साहले आफूलाई अभद्र ब्यवहार गरेको उनको आरोप छ ।

पसल संचालक भगतले बैंकको लापरवाहीले आफूले काटेको चेक बाउन्स हुँदा अन्यायमा परेको तथा कारोवारी समक्ष लज्जित हुनु परेको भन्दै सो प्रकरणको छानबिन, आफ्नो रकम फिर्ता र दोषिमाथी कारवाही हुनुपर्ने माग गरेका छन् ।

यता बैंकका शाखा प्रमुख साहले बचतकर्ता भगतसँग बैंकले कुनै अन्याय नगरेको भन्दै सिस्टममा गडबडीका कारण ब्याज लिन छुट भएको दाबी गरे । उनले भगतमाथी ऋण वापतको ब्याज र जरिवाना गरि बाँकी रहेको रकम खाताबाट कट्टा भएको बताए ।

संचारकर्मीहरुले शाखा प्रमुख साहसँग ऋण, ब्याज र जरिवाना वापतको रकम बाँकी नै रहँदा बैंकले कसरी जग्गा फुकुवा पत्र दियो भन्ने जिज्ञासामा बैंक प्रमुख साहले कम्प्युटर सिस्टमको गडबडीका कारण यस्तो हुन गएको र पछि कम्प्युटरले देखाए अनुसार निजको खाताबाट रकम काटिएको जानकारी दिए ।

श्रोतका अनुसार यसअघि सनराइज बैंकमा रहेको एक कार्यालयको खातामा जम्मा हुनुपर्ने ७५ लाख रुँपैया जम्मा नभएको देखाएको छ । तर, सो कार्यालयले जम्मा गरेको उक्त रकमको भौचर राखेकोले हाल सो विषयमा दुई कर्मचारीलाई बैंकले निलम्बन गरि छानबिन सुरु गरेको छ ।