सप्तरीको खडक नगरपालिकाको लालपट्टीमा दुई पक्षबीच कुटाकुट हुँदा एक जनाको ज्यान गयो,दुई जना घाइते

शुभ नारायण यादव/सप्तरी/असार २५ गते ।सप्तरीको खडक नगरपालिका–९ लालपट्टीमा दुई पक्षबीच कुटाकुट हुँदा एक जनाको मृत्यु भएको छ । अन्य २ जना घाइते भएका छन् ।

वैदेशिक रोजगारमा राम्रो काम नपाएको भन्दै परिवारजन र एजेन्ट पक्षबीच गएराति कुटाकुट भएको हो ।

सप्तरीको राजविराज नगरपालिका –९ जगदरीका एजेन्ट मो.सनाउल मामाघर लालपट्टी पुगेका थिए । सोही क्रममा छोरालाई वैदेशिक रोजगारमा पठाए पनि राम्रो काम नपाएको भन्दै स्थानीय मो.इजराइल र मो.अक्तरको एजेन्ट सनाउलसँग विवाद सुरु भएको वडाध्यक्ष मो.इझारुल मियाँले बताए ।

विवादकै क्रममा दुवै पक्षबीच कुटाकुट नै सुरु भएपछि नातीलाई बचाउन पुगेका सनाउलका हजुरबुबा ७० वर्षीय मो.दाउन मियाँलाई चोट लागेर घाइते भएका थिए ।

उपचारको लागि राजविराजस्थित छिन्नमस्ता अस्पताल ल्याइएकोमा सोही क्रममा उहाँको मृत्यु उपचारको क्रममा भएको जिल्ला प्रहरी कार्यालय सप्तरीका प्रवक्ता एव डिएसपी माधव प्रसाद काफ्लेले बताए ।

उनका अनुसार मृतककाे शव पोष्टमार्टमका लागि राजविराज स्थित गजेन्द्रनारायण सिह अस्पतालमा पठाइएको र घटनाबारे थप अनुसन्धान भइरहेको छ ।