जनकपुरधाम,असार १३ गते।महोत्तरीमा खाल्डोमा गाडिएको अवस्थामा शव फेला परेको छ । जिल्लाको लोहारपट्टी नगरपालिका(७ मा खाल्डोमा भेटिएको शव स्थानीय सुजिता ठाकुरको भएको अनुमान छ ।सो शव गत जेठ १९ गतेदेखि आफ्नै घरबाट बेपत्ता भएकी २६ बर्षकी सुजिता ठाकुरको रहेको स्थानीयको आशंका छ ।
शव सुजिताको घरदेखि करिब डेढ किलोमिटर टाढा खेतमा गाडिएको अवस्थामा फेला परेको उनका भाइ शिवमले बताए । उनका अनुसार सुजिताको शव खेतमा गाडेको सूचना आएपछि प्रहरी बोलाएर उत्खनन गरिएको थियो ।तर, प्रहरीले भने शव सुजिताकै भए/नभएको बारे पुष्टि हुन बाँकी रहेको बताएको छ ।
हत्या गरेर खेतमा गाडेको आशंका पछि प्रहरीले सुजिताकै आफन्तको सहयोगले उत्खनन् गरेको हो । त्यस क्रममा कपाल, नङ र रगत लत्पत भएको माटो फेला परेको प्रहरी स्रोतले बताए । शरीर गलाउन मलखाद र नुनको समेत प्रयोग भएको प्रहरीको भनाइ छ ।
जिल्ला प्रहरी कार्यालयबाट खटिएको टोलीले घरदेखि अन्दाजी एक किलोमिटरको दूरीमा रहेको खेतमा उत्खनन गरेको थियो ।
आफ्नो छोरीको हत्या उसको ससुराली पक्षले गरेको मृतकका पिता कामेश्वर पाण्डेको आरोप छ । छोरीको हत्यामा ससुरा पक्षका व्यक्तिहरू संलग्न भएको पाण्डेयको आरोप छ । उनले सुजिताको हत्या उनका ससुरा पत्तिराम ठाकुर, देवर रुपेश ठाकुर र देवरानी रोमी ठाकुरले गरेको दावी गरेका छन् । उनले आफ्नो छोरीको ससुराली पक्षले घरायसी विवाद हुँदा पटक पटक ज्यान मार्ने प्रयास गर्दै आएको र यसअघि पनि छोरीको ज्यान मार्ने थुप्रै प्रयासहरु भएको बताए ।
उनले भने,‘डेढ वर्ष अघि नै मुद्दा मामिलाको क्रममा प्रशासनको रोहबरमा दुबैपक्षबिच आइन्दा सुजितालाई कुनै प्रकारको यातना नदिने सहमति भएको थियो । तर, यसपटक भने उसको हत्या नै गरियो ।’ उनले प्रहरीले अभियुक्तलाई संरक्षण दिँदै आइरहेको आरोप समेत लगाए ।
यता, जिल्ला प्रहरी कार्यालय महोत्तरीका प्रहरी उपरीक्षक दिनेश आचार्यले आफूहरूले घटनाको गम्भिर रुपमा अनुसन्धान गरिरहेको बताएका छन् ।
सुजिताका ससुरा ५० वर्षीय पतिराम ठाकुर, देवर २६ वर्षीय रूपेश ठाकुर र देवरानी २५ वर्षीया रोमी ठाकुरविरुद्ध किटानी जाहेरी दिन खोजेकोमा प्रहरीले अस्वीकार गरेको पीडित परिवारले जनाएको छ । त्यसपछि खोजतलासका लागि पीडित परिवारले निवेदन दिएका थिए ।
महोत्तरीको लोहारपट्टी नगरपालिका ७ भम्रपुरा निवासी पत्तिराम ठाकुरका छोरा मुकेश ठाकुरसँग पिपरा गाउँपालिका वडा नम्बर–६ बस्ने कामेश्वर पाण्डेयकी छोरी सुजिता ठाकुरको ११ बर्षअघि सामाजिक परम्परा अनुसार बिबाह भएको थियो ।
साभार-द रियल समाचार अनलाईन बाट
Discussion about this post