महोत्तरीका झा दम्पतीको अवस्था सार्वजनिक गर्न माग गर्दै जनकपुरमा चक्काजाम र प्रदर्शन

जनकपुरधाम,फागुन २९ गते।फागुन ११ गते रातिदेखि घरबाटै बेपत्ता पारिएको महोत्तरीको झा दम्पतीको अवस्था सार्वजनिक गर्नुपर्ने माग गर्दै जनकपुरधाममा चक्काजाम गरिएको छ । 

महोत्तरीको पिपरा गाउँपालिका वडा नम्बर–५ स्थित सहोडवाका ६५ वर्षीय मुसाफिर झा र उनकी ६० वर्षीया पत्नी गीतादेवी झाको अवस्था सार्वजनिक गर्नुपर्ने माग गर्दै जनकपुरधाम उपमहानगरपालिका-७ का वडाध्यक्ष जानकीराम साहको नेतृत्वमा तप्सीचोकमा चक्काजाम गरिएको हो । उनीहरूले बिहान ११ बजेदेखि १२ बजेसम्म एकघण्टा चक्काजाम गरेका थिए ।

विरोध प्रदर्शनमा वडाध्यक्ष साहले घरबाटै बेपत्ता पारिएका झा दम्पतीको १९ दिन बिते पनि अवस्था अज्ञात हुनु प्रहरी प्रशासनमाथि गम्भीर सवाल रहेको बताए ।

उनले अपहरित झा दम्पतीको अवस्था तत्काल प्रहरीले सार्वजनिक नगरे आज सांकेतिक चक्काजाम गरेको र दुई दिन पछि हाइवे समेत जाम गर्ने चेतावनी दिए ।

झा दम्पतीलाई फागुन ११ गते सोमबार राति घरमै सुतिरहेको ओछ्यान सहित बेपत्ता पारिएको थियो ।

उक्त घटनामा प्रहरीले ४ जनालाई नियन्त्रणमा लिई सोधपुछ जारी राखेको छ । बेपत्ता दम्पतीका छिमेकीसमेत रहेका जग्गा व्यवसायी रामबाबु यादव, भारतीय नागरिक हरेन्द्र ठाकुरसहित ४ जनालाई पक्राउ गरिएको प्रहरीले जनाएको छ ।साभार-फरकधार अनलाईन बाट