प्रदेश २:पञ्चायतले ५ हजार रुपैयाँ जरिवाना सुनाएपछि एक महिलाद्वारा आत्महत्या

जनकपुरधाम,फागुन १५ गते।परम्परागत रुपमा रहेको पञ्चायती प्रथा अहिलेसम्म हट्न नसक्दा तराई मधेसमा विभिन्न किसिमका घटनाहरु निम्तिने गरेको छ । पञ्चायतीकै कारण ५ हजार रुपैयाँ जरिवाना तोकिएपछि एक महिलाले आत्महत्या गरेको खबर बाहिरिएको छ । 

धनुषाको औरही गाउँपालिका वडा नम्बर २ स्थित देउरी बस्ने रामजीवन यादवकी पत्नी ३६ वर्षीया विनिता देवी यादवले अर्काको खेतमा रहेको साग टिपेको विषयमा गाउँमा पञ्चायती भएको थियो । सोबारे पञ्चायतीले बिनितालाई ५ हजार रुपैयाँ जरिवाना गरेको थियो । सो जरिवाना उनले तिर्न नसकेपछि आत्महत्या नै गरेकी हुन् । 

गत बिहीबार दिउँसो सोही ठाउँ बस्ने सुमित्रा देवी यादव र बबिता यादवसँग विनिता यादव गाउँको छेउमै रहेको खेतमा घाँस काट्न गएकी थिइन् । घाँस काट्न गएकी बिनिताले अर्काको खेतमा साग टिपेको उनीमाथि आरोप लागेको थियो । 

त्यसपछि वडाध्यक्ष अमित यादवको अगुवाइमा गाउँमा पञ्चायती बसी घाँस काट्न गएका सबै महिलाहरुलाई प्रतिव्यक्ति ५ हजार रुपैयाँ जरिवाना तिर्नुपर्ने निर्णय तत्कालै  सुनाइएको थियो ।एक स्थानीयले बताए अनुसार घाँस काट्न गएकी महिलाहरूमाथि साग टिपेको आरोप लगाउँदै कुटपिट भएपनि कुटपिटबारे कुनै छलफल नगरी एकाएक जरिवाना सुनाइएको थियो । पञ्चायतले जरिवाना तोकेपछि घर फर्केकी बिनिताले सामाजिक रुपमै आफूलाई अपमान गरेको भन्दै सो सहन नसकेर आत्महत्या गरेको आफन्तजनको भनाइ छ ।

शुक्रबार दिउँसो बबिता घरभित्रै पंखामा सल बाँधेर पासो लगाई झुन्डिएको अवस्थामा फेला फेला परेको थिइन् ।यस घटना विषयमा थप अनुसन्धान भईरहेको धनुषाका प्रवक्ता प्रहरी तथा नायव उपरिक्षक मकेन्द्रकुमार मिश्रले जानकारी दिए । उनले प्रारम्भिक अनुसन्धानबाट पञ्चायतले महिलालाई ५ हजार रुपैयाँ तिर्न भनेको निर्णय अनुसार तिर्न नसक्दा आत्महत्या गरेको हुनसक्ने अनुमान गरिएको बताए । सो घटनाले अहिले गाउँमा भागाभाग छ ।

साभार-रातोपाटी डट कम