जनकपुरधाम/मंसिर ४ गते । नेपाली कांग्रेसका पूर्वउपसभापति विमलेन्द्र निधिले पार्टीको १५औँ राष्ट्रिय महाधिवेशन आगामी मंसिर २१, २२ र २३ गते काठमाडौंमा आयोजना हुने जानकारी दिएका छन्। महाधिवेशनको उद्घाटन काठमाडौंको टुँडिखेलमा हुने र निर्वाचनसम्बन्धी कार्यक्रम राष्ट्रिय सभागृहमा सञ्चालन गरिने उनले बताएका छन्।
शुक्रबार जनकपुरधाममा आयोजित पत्रकार सम्मेलनमा निधिले महाधिवेशनको तयारी तीव्र रूपमा भइरहेको जानकारी दिँदै पार्टीका वडा, क्षेत्र र जिल्ला तहका अधिवेशन सम्पन्न गरी प्रदेश अधिवेशनको प्रक्रिया अघि बढाइएको बताए।
उनका अनुसार देशका १६५ निर्वाचन क्षेत्रमध्ये १४४ क्षेत्रमा क्षेत्रीय अधिवेशन सम्पन्न भइसकेको छ भने ७७ जिल्लामध्ये ५२ जिल्लामा जिल्ला अधिवेशन सम्पन्न भएको छ। बाँकी क्षेत्र तथा जिल्लामा पनि अधिवेशनको प्रक्रिया जारी रहेको उनले बताए।
पत्रकार सम्मेलनमा निधिले सातै प्रदेशको अधिवेशन तालिकासमेत सार्वजनिक गरेका छन्। जसअनुसार गण्डकी प्रदेशको मंसिर ५ गते पोखरा, लुम्बिनी प्रदेशको ७ गते दाङको भालुवाङ, कर्णाली प्रदेशको १३ गते सुर्खेत र मधेश प्रदेशको १४ गते जनकपुरधाममा प्रदेश अधिवेशन हुनेछ।
त्यस्तै, सुदूरपश्चिम प्रदेशको मंसिर १५ गते धनगढी, कोशी प्रदेशको १७ गते विराटनगर र बागमती प्रदेशको १९ गते काठमाडौंमा अधिवेशन आयोजना गरिने उनले जानकारी दिए।
मधेश प्रदेशको अधिवेशन खुला मैदानमा गर्ने वा सभाहलमा आयोजना गर्ने भन्ने विषयमा छलफल भइरहेको निधिले बताए। अधिवेशनको तयारीलाई व्यवस्थित बनाउन बर्दिबासमा मधेश प्रदेशका आठै जिल्लाका जिल्ला सभापति, ३२ निर्वाचन क्षेत्रका प्रतिनिधि तथा केन्द्रीय पदाधिकारी र सदस्यहरूको बैठक बस्ने तयारी रहेको उनले जानकारी दिए।
मधेश प्रदेशका संयोजक पद्मनारायण चौधरीसहित नेताहरूको सहभागितामा हुने उक्त बैठकले प्रदेश अधिवेशनको तयारी, व्यवस्थापन र आवश्यक समन्वयका विषयमा समीक्षा गर्नेछ।
निधिले पार्टीको विधान, देशको कानुन तथा संगठनात्मक परम्पराअनुसार वडा तहदेखि प्रदेश तहसम्मका अधिवेशन सम्पन्न गरेर मात्रै राष्ट्रिय महाधिवेशनमा सहभागी हुने स्पष्ट पारे।
जनकपुर–अयोध्या रेल र हवाई सेवा नियमित गर्न प्रधानमन्त्रीको ध्यानाकर्षण
यसैबीच, पूर्वउपसभापति निधिले प्रधानमन्त्री बालेन्द्र शाहको आगामी मंसिर ६ गतेदेखि हुने भारत भ्रमणको सफलताको शुभकामना व्यक्त गरेका छन्।
प्रधानमन्त्रीको भारत भ्रमणका क्रममा जनकपुरधाम–अयोध्या रेलसेवालाई नियमित सञ्चालन गर्नुका साथै जनकपुर–अयोध्या हवाई सेवा सुरु गर्ने विषयलाई प्राथमिकताका साथ उठाउनुपर्ने उनले बताएका छन्।
नेपाल–भारतबीच आर्थिक विकास, सीमा व्यवस्थापन, व्यापार तथा अन्य द्विपक्षीय सहकार्यका क्षेत्रमा भ्रमणले सकारात्मक उपलब्धि हासिल गर्ने विश्वास व्यक्त गर्दै निधिले प्रधानमन्त्रीको भारत भ्रमण सफल हुने अपेक्षा गरेका छन्।

















Discussion about this post