जनकपुरधाम/कार्तिक १५ गते । सञ्चारमाध्यमको कार्यालयमा प्रवेश गरी पत्रकारमाथि धरपकड गरिएको घटनाको विरोधमा मधेश प्रदेशको राजधानी जनकपुरधाममा पत्रकारहरूले प्रदर्शन गरेका छन्।
नेपाल प्रहरीले शुक्रबार विभिन्न सञ्चारमाध्यमका कार्यालयमा प्रवेश गरी पत्रकारमाथि गरेको धरपकडको विरोधमा नेपाल पत्रकार महासंघ धनुषा शाखाको नेतृत्वमा शनिबार प्रदर्शन गरिएको हो।
प्रेस स्वतन्त्रताको रक्षा, पत्रकारको पेसागत सुरक्षाको प्रत्याभूति तथा सञ्चारमाध्यममाथि हुने हस्तक्षेप बन्द गर्न माग गर्दै पत्रकारहरू विरोध प्रदर्शनमा उत्रिएका हुन्।
प्रदर्शनमा सहभागी पत्रकारहरूले स्वतन्त्र पत्रकारितामाथिको हस्तक्षेप कुनै पनि अवस्थामा स्वीकार्य नहुने भन्दै प्रहरीको उक्त कदमको विरोध गरेका थिए। उनीहरूले प्रेस स्वतन्त्रता लोकतन्त्रको आधारस्तम्भ भएकाले सञ्चारमाध्यम र पत्रकारलाई निर्भीक तथा स्वतन्त्र रूपमा काम गर्ने वातावरण सुनिश्चित गर्न राज्यसँग माग गरेका छन्।
पत्रकारहरूले राज्यका सुरक्षा निकायबाटै सञ्चारमाध्यमको कार्यालयमा प्रवेश गरी पत्रकारमाथि धरपकड गरिनु प्रेस तथा अभिव्यक्ति स्वतन्त्रता र लोकतान्त्रिक मूल्य मान्यतामाथिको चुनौती भएको बताएका छन्।
उनीहरूले घटनाको निष्पक्ष छानबिन गरी दोषीमाथि आवश्यक कानुनी कारबाही गर्नसमेत माग गरेका छन्।
प्रेस तथा अभिव्यक्ति स्वतन्त्रताको संरक्षण र पत्रकारको पेसागत सुरक्षाको मागसहित आयोजित प्रदर्शनमा जनकपुरधामका विभिन्न सञ्चारमाध्यममा आबद्ध पत्रकारहरूको सहभागिता रहेको थियो।
पत्रकारहरूले सञ्चारमाध्यमलाई स्वतन्त्र रूपमा समाचार सम्प्रेषण गर्ने वातावरण बनाउन तथा पत्रकारमाथि हुने कुनै पनि प्रकारका दुर्व्यवहार र हस्तक्षेप तत्काल रोक्न सम्बन्धित निकायको ध्यानाकर्षण गराएका छन्।
Discussion about this post