जनकपुरधाम/कार्तिक १४ गते । धनुषाको गणेशमान चारनाथ नगरपालिकामा बालबालिका तथा किशोरकिशोरीको मानसिक स्वास्थ्य प्रवर्द्धन, लागू पदार्थको प्रयोग न्यूनीकरण तथा आत्महत्या रोकथामसम्बन्धी अभिमुखीकरण कार्यक्रम सम्पन्न भएको छ।
२०८३ कात्तिक १३ गते (३० अक्टोबर २०२६) आयोजित उक्त कार्यक्रम सीबीएम ग्लोबल नेपालको सहयोग तथा सी.एम.सी.–नेपाल र गणेशमान चारनाथ नगरपालिकाको लागत साझेदारीमा सञ्चालित ‘मनको साथी’ बालबालिका तथा किशोरकिशोरी मानसिक स्वास्थ्य प्रवर्द्धन परियोजनाअन्तर्गत आयोजना गरिएको हो।
नगरपालिकाका उपप्रमुखको अध्यक्षतामा सम्पन्न कार्यक्रममा प्रमुख प्रशासकीय अधिकृत, विभिन्न शाखाका प्रमुख, नगरपालिकाका ११ वटै वडाका कम्प्युटर अपरेटरसहित ३३ जनाको सहभागिता रहेको थियो।
कार्यक्रममा स्वास्थ्य शाखाअन्तर्गत विपद् व्यवस्थापनका फोकल पर्सनले सहजीकरण गर्नुभएको थियो। परियोजना अधिकृतले परियोजनाको उद्देश्य तथा गतिविधिबारे जानकारी गराउँदै बालबालिका र किशोरकिशोरीको मानसिक स्वास्थ्यप्रति सरोकारवालाहरूको बुझाइ, संवेदनशीलता र जिम्मेवारी अभिवृद्धि गर्ने विषयमा प्रस्तुतीकरण गर्नुभएको थियो।
त्यसैगरी, मनोसामाजिक परामर्शकर्ताले समुदायस्तरमा सञ्चालन भइरहेका कार्यक्रम तथा सेवाबारे जानकारी गराउनुभयो। उहाँका अनुसार परियोजनामार्फत हालसम्म १३ जना सेवाग्राहीलाई विभिन्न चरणमा व्यक्तिगत मनोसामाजिक परामर्श सेवा प्रदान गरिएको छ।
कार्यक्रमले बालबालिका तथा किशोरकिशोरीको मानसिक स्वास्थ्यसम्बन्धी समस्या पहिचान, समयमै सहयोग तथा उपचारका लागि आवश्यक समन्वय र सहकार्य बढाउनुका साथै लागू पदार्थको प्रयोग न्यूनीकरण र आत्महत्या रोकथामका प्रयासलाई स्थानीय तहमा प्रभावकारी बनाउन सहयोग पुग्ने अपेक्षा गरिएको छ।
कार्यक्रमको समापन मन्तव्य राख्दै नगर उपप्रमुखले व्यस्त दैनिकीका बाबजुद अभिभावक तथा सरोकारवालाले बालबालिकासँग पर्याप्त र गुणस्तरीय समय बिताउनुपर्नेमा जोड दिनुभयो। बालबालिकाको भावना बुझ्ने, उनीहरूका समस्या सुन्ने र आवश्यक साथ तथा सहयोग प्रदान गर्ने वातावरण निर्माण गर्नुपर्ने उहाँको भनाइ थियो।
उहाँले नगरपालिकाको कार्यपालिका भवनभित्रै मनोसामाजिक परामर्श केन्द्र छिट्टै सञ्चालनमा ल्याउने प्रतिबद्धतासमेत व्यक्त गर्नुभयो।
स्थानीय तहमा मानसिक स्वास्थ्य सेवाको पहुँच विस्तार तथा बालबालिका र किशोरकिशोरीका समस्यालाई समयमै सम्बोधन गर्न यस्ता कार्यक्रमले महत्वपूर्ण भूमिका खेल्ने विश्वास गरिएको छ।
Discussion about this post