गरुडा नगरपालिकाका कर्मचारीको १३ बुँदे माग, दसैंअघि तलब नदिए आन्दोलनको चेतावनी

सञ्जय मिश्रा/रौतहट/१४ असोज । रौतहटको गरुडा नगरपालिकाका कर्मचारीले लामो समयदेखि रोकिएको तलब–भत्ता तत्काल उपलब्ध गराउन माग गर्दै नगर कार्यपालिकालाई १३ बुँदे मागपत्र बुझाएका छन्। कर्मचारीहरूले दसैंअघि नै विगतको बक्यौता र चालु आर्थिक वर्षको तलब–भत्ता भुक्तानी गर्नुपर्ने भन्दै असोज २१ गतेसम्मको अल्टिमेटम दिएका छन्।

स्थायी, करार तथा दैनिक ज्यालादारीमा कार्यरत कर्मचारीले तलब–भत्ता रोकिँदा दैनिक जीवनयापनमै समस्या परेको भन्दै नगर नेतृत्वको ध्यानाकर्षण गराएका हुन्।

कर्मचारीहरूले स्वीकृत दरबन्दीअनुसार कार्यरत करार कर्मचारीको म्याद तत्काल थप गरी पारिश्रमिक उपलब्ध गराउन, स्वीकृत दरबन्दीभित्रका कर्मचारीलाई हटाउने वा संख्या घटाउने काम नगर्न तथा पोशाक, चाडपर्व र महँगी भत्ता उपलब्ध गराउन माग गरेका छन्।

त्यस्तै वडा कार्यालयमा कार्यरत वडा सचिवका लागि आवश्यक कार्यालय सञ्चालन खर्च उपलब्ध गराउन, नगरपालिकाको खर्च गर्ने अख्तियारी तथा बैंक खाता तत्काल सञ्चालनमा ल्याउन र स्वीकृत दरबन्दीअनुसार कर्मचारीलाई जिम्मेवारी दिनुपर्ने उनीहरूको माग छ।

वडा तथा विषयगत शाखामा आवश्यकताअनुसार कर्मचारी व्यवस्थापन गर्नुपर्ने, प्रचलित ऐन, नियम तथा कार्यविधिअनुसार काम गर्ने वातावरण बनाउनुपर्ने र करार कर्मचारीलाई सामाजिक सुरक्षा कोषमा आबद्ध गर्नुपर्ने माग पनि ज्ञापनपत्रमा समेटिएको छ।

कर्मचारी कल्याण कोष, बीमा तथा कर्मचारीसँग सम्बन्धित विगतदेखिका अन्य बाँकी रकमसमेत तत्काल भुक्तानी गर्न उनीहरूले माग गरेका छन्।

कर्मचारीका अनुसार यी विषयमा यसअघि पटक–पटक मौखिक रूपमा नगर नेतृत्वको ध्यानाकर्षण गराए पनि ठोस पहल हुन सकेको छैन। त्यसैले यसपटक लिखित रूपमा १३ बुँदे माग अघि सार्दै असोज २१ गतेभित्र माग सम्बोधन नभए शान्तिपूर्ण दबाबमूलक कार्यक्रम अघि बढाउने चेतावनी दिएका छन्।

दसैं नजिकिँदै गर्दा समेत तलब–भत्ता अनिश्चित बनेपछि कर्मचारीहरूले नगरपालिकालाई तत्काल समस्या समाधान गर्न दबाब दिएका हुन्।