आजदेखि एक हजारका नयाँ नोट चलनचल्तीमा, गभर्नर पौडेलको हस्ताक्षर

काठमाडौँ, ८ असोज । नेपाल राष्ट्र बैंकले बिहीबारदेखि एक हजार रुपैयाँ दरको नयाँ नोट चलनचल्तीमा ल्याएको छ ।

राष्ट्र बैंकको मुद्रा व्यवस्थापन विभागले असोज ८ गते साविककै आकारमा रंग परिवर्तन गरिएको एक हजार रुपैयाँ दरको ‘सिरिज २०२५’ नोट चलनचल्तीमा ल्याएको जनाएको छ ।

नयाँ नोट वैजनी रंगको घेराभित्र फिक्का हरियो रंगको छ । नोटको अग्र भागको मध्य खण्डमा श्री नेपाल राष्ट्र बैंक, नेपाल सरकारको जमानत प्राप्त यसको रुपैयाँ भुक्तानी माग्न आएमा नेपाल राष्ट्र बैंकबाट रुपैयाँ १००० रुपैयाँ एक हजार तुरुन्त पाइने छ भन्ने उल्लेख छ ।

नोटको बायाँतर्फ सगरमाथा हिमालको चित्र र दायाँतर्फ लालीगुराँसको पानीछाप राखिएको छ । नोटको दायाँतर्फको तल्लो भागमा दृष्टिविहीन व्यक्तिले स्पर्श गरी पहिचान गर्न सहजताका लागि एक हजार अंक जनाउने रोमन अक्षर एम राखिएको छ । सगरमाथाको बायाँतर्फ र पानीछापको दायाँतर्फ १०–१० वटा तेर्सा रेखा राखिएका छन् ।

सगरमाथाको दायाँतर्फ अण्डाकार आकृतिभित्र सीधा हेर्दा सुनौलो र ढल्काएर हेर्दा हरियो देखिने भगवतीको चित्र राखिएको छ । नोटमा ३ दशमलव ५ मिलिमिटर चौडाइको सुरक्षण धागो राखिएको छ । नयाँ नोटमा गभर्नर विश्वनाथ पौडेलको हस्ताक्षर छ ।

नोटको पृष्ठ भागको मध्य खण्डमा राम र लक्ष्मण भनी चिनिने जुम्ल्याहा दुई हात्तीहरूको चित्र राखिएको छ । नोटको पृष्ठ भागमा पानीछापको दायाँतर्फ नेपालको सातवटा प्रदेश जनाउने गरी सातवटा लालीगुराँसका चित्र प्रयोग गरिएको छ । केही दिनअघि राष्ट्र बैंकले ५० रुपैयाँ दरका नयाँ नाेटकाे सिरिज सार्वजनिक गरेकाे थियाे ।